Bi rawestan kêlîkek bêdeng li ser giyanê peyva azad ku xwedanê wê temenek di ber de dane beşdarên roja çaremîn di mehrecana çîroka kurdî de, dest bi pirogramê rojane kirin. Mehrecana ku ji hêla Yekîtiya Nivîskarên Kurd – Sûriya hatibû destnîşankirin û ev çar roj li hola Subarto li bajarê Qamişlo berdewam e, gelek çîrok tê de hatin xwendin û guftugokirin. Destpêkê birêvebirê şevbuhêrkê mamoste Fewaz Osê danasînek kurt li ser jiyana her du çîroknivîsan xwend, tê de hat: Nivîskar Xorşîd Ehmed: Di sala 1962-an de li gundê Nesranê ji dayik bûye.
Bi zimanê kurdî û Erebî dinivîse, endezyar û mafnas e, ji pirtûkên wî yên çapkirî: Nesran û pîvanên dî – Dawiya Xewnekê – çîroka Kurdî li Sûryayê, lêkolîn – dawîtirîn nûçeyên şaneşînan- riyên kewan, destnivîs. Nivîskar Luqman Yûsif: Sala 1965-an de li gundê Til şeîrê ji dayik bûye, 1984-an de bawernameya wêjeya Frensî ji zanîngeha Helebê wergirtiye. Di 1992-an de dest bi nivîsê kiriye, xwedî du pirtûk e: Reş û Spî – Til şeîrê. Destnivîsek çîrok li ber çapê heye. Çîroka nivîskar Xorşîd bi navê “Perû” bû, û li ser serdema dagirkirina Firensa ji Sûriyayê re û şerê gundê Beyandûrê diaxive. Lê ya nivîskar Luqman li ser xortekî di xewneke kûr de wer dibe û gelek serpêhatî tên serê wî, dawî ji xewa xwe radibe. Îroj gelek guftûgo li ser her du çîrokan çêbûn, nemaze ya bi navê ” Perû” ku hindek xal in dîrokî dikole û şîrove dike, û ew xal di navbera nivîskar û hindek ji beşdaran bû mîna pirsgirêkek, lê ji ber ferehbûna diyalgê ku ji warê rexnê û mijara çîrokê derket ew xale çareser nebûn û guftugo ji aliyê birêvebirê şebuhêrkê ve hat birîn. Hêjaye gotinê ku sibe du çîroknivîsên dî wê çîrokên xwe bixwînin, ew jî nivîskar Ebbas Mûsa, û Narîn Metînî ne.
Yekîtiya Nivîskarên Kurd- Sûriya
9-6-2014-an
Qamişlo
Yekîtiya Nivîskarên Kurd- Sûriya
9-6-2014-an
Qamişlo
