Mizgîn Hesko
Hîn ew dayik
Bermayên kezyên xwe
Diçêre
Da ku rengê ken
di hinarkên mendalên xwe de
bidomîne.
Hîn di şev zivistanan de
Bi çîrok û çîvanokên mêweyan
Tama sêva
Li ser zimanê sêwiyên xwe
Di,afirîne.
Hîn pişta wan
bi şîrtên Xanî
daxdidî
û ramanên wan
di tenûra çandê de
dikewitîne
hîn ji nifiştên paşla xwe
ayetên Cezîrî
her roj
bîst û çar
nimêj dixwîne.
Hîn wan
Di dergûşa dastanan de
Dilorîne.
Hîn terîşên miradê
Bi destê wan ve
Girêdidî
Û ji tûrikê karwanan
Kilçîvê keçan
Bi kil dadgirî .
Hîn bi morîkên şîn
Desmalên zeryan
Dixemilîne
Hîn ji bawîbûna sînoran
Û seqema peymanan
Tilyên xwe
Vêdixe.
Koremar
qaşo..
di nav baweşîna aştiyê de
navê xwe jibîr kir
û hîn li heyranokên Cezîrabota
serpêhatiyên Hekarê
û hoşmendiya Zaza
xwedî dernakeve.
Şehdedar
gava ku xwest cejnan
bi kurdî pêşwazbikî
bi şûr hate birrîn.
Navçar
gava ku xemla bûkaniyê li xwe kir
her sê xwîşkên din
bi lîlelîl
her yekê
kirasê şîraniyê
yê pembe amade kir
her yekê
dîlan li gor xwe
şîrove kir
xwestin ji govendê bê paar nimînin
û hîn di qorzîkên pencereyan de
dev ji hev çûyê dinerin.
Bablîcank
li ber dergehê
çerxê bîst û yekê
bi çavên xwe dibîne
çawa kurên wê
têne sêdar kirin
û li ser maseya Atom programan de
programa yekem
kurd tunene.
programa diwem
sêdar kirina wan helale.
Qilîçank
ji xwe ax…
ji derdê wê
rojekê xwîşka herî kihêlbû
ji bo xwîşkên din
her û her bi kêêr bû
û îro rewa lê nemaye
û her çend mehan
nûbarekî seqet
bertavêje
û her çend mehan
nûbarekî seqet
bertavêje
û destarê hêviya
îdî hêdî hêdî digere
û dayik.
pirr westiyaye
pirr westiyaye…!
îdî hêdî hêdî digere
û dayik.
pirr westiyaye
pirr westiyaye…!
û tevlî westanê
tilîkên vêketî
qet venamirin
tilîkên vêketî
qet venamirin
volkana di dilkê çiyê de
guregur
ar
û serhildan disincirin.
guregur
ar
û serhildan disincirin.
Sibat 2010
………………………………………………….
koremar- şehdedar- navçar- bablîcank- qilîçank- navê tilîkên destê mirov in
