Xizan Şîlan
şev û rojên min
bi nalîn û keservedanên kûr
dibihurin
hinavên şewitî
bûye cîhê gund û bajarên
hilweşiyayî
henasa gewriya fetisî
ji bayê havînên nerm
werdigirim
rengê keskesora derûniya min
çilmisî
li ser axa şaristaniyê
koçberî û derbederî her tim
ketin para min
jiyana bêbext
ez bi êşa pêsîrên felekê
mijandim
temenê min yê mesûm
birîneke kevnare ye
li bêxewiya şevên kor
di janeke hovane de
dilerizim
çirûskên tava berbangên şad
xatir ji min xwestin
salên kambax demsalên xwe
ji bîr kirin
kul û keder
li nav nivînên odeya xemkêş
ramedîne
çîrokên dapîra min bêxwedî man
bişkojên saqoyê hestên tevlihev
qetiyan
çûkên serê sibehê
di awirên min yên melûl de
wîçewîç in
pişta stûna konê bextewariyê
xûz bû
pelên dara hezkirinê
weşiyan
eniya neynika qederê
qurmiçî
ez
bi gavên gêjok û şemitok
li dor xeyalên tevizî
dizivirim
werin
mirina min ya bêwext û bêbext
ji helbestên ji bîrbûyî
ji darbestên bêxwedî
ji avdestên ferişteyên nûranî
ji destên nasir girtî
û
ji sermestên meyxaneyan
bipirsin
Xizan Şîlan
2021-04-08
Stockholm
Şîrove (0)