Boniye- Suad Cegerxwîn Weke kû hatiye zanîn , em di civateke fewdal de dijîn ,patriarkalismê,ji demên dûr û dirêj ve şaxên xwe tê de fireh û kûr kirine ,ji lora civata me bi giştî bi dîtina mêra hatiye avakirin ,herdem mêrin yên kû gavên mezin têde davêjin ,cihê bilind û giring digrin ,li gor daxwazên xwe biryara didin ,bi vî awî civata me hatiye naskirin , lê îro roj jina hinekî xwe dane xuyakirin û ji aliyê aborî ve rewşa xwe çêtir kirine, civat û malbatên Kurda bi aliyê pêşketinê ve diçin
lê nayê wê watê ku wekhevî û azadiya giştî bi cî hatiye, ew jêre xebatên dûr û dirêj divên ,jin hîn di hest û ramanên xwe de sînorkirîne her û ha ji qata nizim têne jimartin , herdem di malbatê de gotina bav û lawa di pêşî de ye , keç li gor wan diçin, ji lora jin di helwestên xwe de xemgîn û bêzar mane .Eger em li sedemên serekî bipirsin ,divê em vegerin ji bingehê lê temaşekin ,wê demê emê binerin kû sedema cudatiya di nav herdû celeban de ji destpêkê ve dê û bavin, jiber kû ewin yên kû malbatê perwerde dikin û awê jiyanê ji endamê wê re saz dikin ,ewjî bi hesanî li gor dîtina civata xwe çûne û xwe perwerdekirine yanî ji keça re dane zanîn kû divê ew tim peyrewên bav û birayê xwe bin ,li gotina wan guhdar bin û herdem xwe bi wan serbilind bibînin .Ji loma jin hînbûye kû tim alîkariyê ji mêran bixwaze û li gor wan bilive .Bi vî awî baweriya wê pê kêm dibe,zû birîndar dibe ,diltenik dibe ,zû digrî,nikare bi tena xwe destpê bike ,lê gelekî bi saman û deyax dibe ,pir ji pêkarînên xwe dide dora xwe û pir hindik ji wan distîne ,mêr jî xwedyê gotinê ne ,tûnd û dil hişkin ,xwe berpirsyarê jinên malbatê dibînin ,bêhn tengin ,dixwazin tev li wan guhdar bin ,li gor wan biçin ji ber kû ew xwe pêşewê teva dibînin .Bi vî awî keç di ber siya mêran de kesayetiya xwe ava dike , baweriya wê bi pêkarînên wê kêm dibe îdî mêr dibe Çalakê malbatê û bê sînor tevgera xwe dike ,ji mafê wî ye kû xwe bi hêrs bike û yên dora xwe xemgîn bike, lê ji bo jinê herdem bêdengî xwestine .Ev awir bi vî awî Çûye û di civatê de cî girtiye, zû pêşve çûye û herdû celeb bi vî rengî li gor perwerdekirina dê û bava mezin bûne îdî em karin bi hesanî bêjin kû dê Û bav di ber vê cudabûnê de berpirsyarin , tu teyorî û dîtinên pedegojî tune ne kû ji vî awê perwerdekirinê re berevan bin ,civata me kû ji malbatên bi van dîtinên paşverû ava dibe biryara jiyana teva dide ,bi vî awî mêr dimînin jêderê berzî û tûndiyê ,jin jî yê lawazî û bê zariyê ,û ya rastî ewe kû law ji destpêka çêbûna xwe zeîfin, lê dê û bav ,civat baweriyê didin wan ku hêdî hêdî xwe tund û bi hêz bibînin ,ji lora em dibînin kû keç bi serê birayê xwe tim sûnd dixwin û xwe bi wa dibînin , eger karekî ji hina re bikin ,sipasiya karê wan ewe kû ji wan re dibêjin xwedê birayê te bihêlî , li şûna kû bêjin ,destê te sax bin yan jî mala te ava .Ji bo vê yekê mêr zanin çi dixwazin ,jin jî wek perê li ber bê ne , nizanin wê li ku deynin û qedera wan çiye ,ji xwe daxwazên wan hatine perçiqandin û pêşeroja wan ne belu ye .Eger em bixwazin bi rastî civateke azad û pêşketî saz bikin ,divê em ji malbata xwe dest pêbikin ,em wek dê û bav wekhevîyê di perwerdekirina zarokê xwe yên nêr û mê ji destpêkê de çêkin, her yek ji wan bela li gor daxwaz û pêkarînên xwe azad mezin bibe . Zarok li gor perwerdekirina di zaroktiyê de form dibin û kesayetiya wan li gor wê formê ave û durust dibe ,nasnama wan xuya dibe , îdî erkê me ye em wek dê û bav berpirsyariyaxw bi zanestî bibin serî,da zarokên me di pêş erojê de me gunehkar nekin .
