Fewaz EBDÊ
Xak
rehên xwe li ber ronahiyê vedike
rokê weke piyaleke meyê di 21ê Adarê de vedixwe
Çiya
xeftanekî ji bê davêje ser mile xwe
radibe ser tilîkan û çirayên xwe li quntaran vêdixîne
li asîman reng vedidin
canê dapîr û bapîran li ser serê me dirêsin..
Çem
bêdengiya Zivistanê ji ser milê xwe davêje
Kurdo
mîna Sîmir ji nav terafê radibe
li ser birîna devê şûr direqise
û ji kevir û kuçên çiyê re distirê;
ewên ku yek rojê xayintî lê nekirin.
Kurdo û Xweza hevalcêwîne
ew tayê geyayî zirav e ku serê xwe
ji qelşên keviran derdixîne
ew çûkê ji devê tivingê direve.
Kurdo siya stiranên li keviyên çem e
Kurdo û Xweza
mîna du evîndarên piştî demeke dirêj hev bibînin
hev himêz dikin
di çavê wî de azadî û
li bejna wê kirasekî gulgulî.
Newroz
ne hema rojeke
ne hema cejneke
Newroz
deqa li destê dayikan e
birîneke kesk e di sînga dîrokê de
dûmana ji hinavê efsanê dertê
dengê Kawa ye çaxê di ruwê hesin de qêriya
agirê Kawa ye û hê terafa wî di destê zarokan de difiride
weke stiranekê
weke şûnbirînekê
weke sûndeke herheyî
nifşek disperse nifşekî
Di bajarên bi hesin bendkirî de
Di sikakên navan dadqurtînin de
Zarokên kurd rokê li ser dîwaran çêdikin
Karmend ji kar direve
Xwendekar ji dibistanê
çikû riya dibistanê girtiye û
Newroz deriyê xwe ber bi asoyên bêdawî ve vedike
Newroz
agireke li jora çiyê
qublegeha xaka ji mirinê radibe
di qirika bablîsokê de; şîhîna xortan e û
keskesoreke di nav tiliyên qîzan re bazdide
Newroz
di çavê qîzan de kirasekî ji rivîna agir e
keç û xort xwe di ser xeleka agir re çemdikin
xwe davêjin serdemên nehatî
Çiya xwe dadixe û li wan temaşe dike
Xak navê kesên di ser re bûrîn dinivîse
Ew navên ku
bûne reh
bûne stiran
Newroz ne hema rojeke
Newroz çîroka azadîxwazan e
azadîxwazên bi zengelorka xwe
qeyd û bendên zordariyê şikandin û
bi xwîna heyvê gul avdan.
Newroz nûkirin e
nûbûn e
hêvî ye
azadî ye
keskesoreke zindî ye
di sînga asîman de stiraneke kurdî ye
Agirê Newroza ne hema xetîreke
ew bîrdanka bapîran e
qarîna Kawa ye
Ejdehak têk bir û ro ronîkir
Kurdo!
Çiqasî Newroz dişibe te;
Her ku dijmin wê diperçiqîne
di bin nigê wî de
dibe kaniyeke gul û
di birîna hebûnê de dipişkuve.
===============
Tablo, şêwekar: Luqman Ehmed.
