TU EZIM

Bêkes Reşîd

  Bo … çavên keçka min (Hêja).

Ji destpêkê ve min xwestibû ez hebane
… Bi vî rewanî… bi van hêviyan
… Bi hemû nigaşên ko hîna nebûne!!…
Min xwestibû hertişt hebane
… Xweberîtiya min di serî de bane
… Ristika divayan ji stûyê min çiriyabane
… Bê xwestek hebane
Tu jî hebane
Tu ez bane

… Ne xewnek, ne awirek… ne jî ramanekî tal nedîtibane
Min xwestibû …
Bi hemû awayan…
Ji destpêkê ve min gelek tişt xwestibûn
Ji tiştên nebûyî jî bêtir!!!…
Te jî xwestibû ?
Xwestina te berî hertiştî bû
Xwestina te fermanbû… !!
Ax… ax…
Ax bavê mino ax…
Ko her raman bo te be…
Ko her tişt bo te be…
Ko her hundur û derve bo te bin…
Ko tu ez bim… !!
Te bi çi terzî ji mandê werînim?
Te bi çi awayî di xwe de zindî bikim?
Ji pizdan…
Ji ber germa sînga te…
Riwê min yê ko ji hêsirên te şil dibû…
Gewdeyê te yê lawaz…
Rebeniya te… û
Hemû hêlên te… ezim
Min bihêle
Min veşêre
Tu tenê xewna bêdawî
Buhuşta yekemîn…
Buhuşta piçûkaniyê…
Ax dayika minî sêwî mabû…
Tu mirin in sosret şiyardike
Valayiyên ko tu ji min re çêdike vedimalim
Hatinên te… bendewariyên te…
Bêhna min ko her şev meya teye
Tu her ezim û hindek ji ezman
Keçka minê…
Ax keçka minê ax…
Heger tu bixwaze…
Heger tu bipirse…
Ji min yan ji tiştin din?
Yan jî ji xwe?
Tevaviya rastiyê bipoşe
Wilo bibe ( Ez )…
Hertiştî ji xwe re bibe
Ne weke ez bixwazim…
Ne weke ko pîçek jî bixwaze…
Wek hebûneke din… !!
         Awarayîyeke din… !!
         Xweberîyiyeke din… !!
Wilo bawer dikim tu biafire…
         Tu xwe û min biafirîne…
Gelo wê xema çi û kî be ?
Li gor te…
Ne li gor tiştekî din…
Ne li gor min jî…
Hin ji bin xakê û hin jî ji hebûneke din
Dayika minî piçûk
Helbesta minî dawî…
Mayîna rastî…
Di vî temenî de
Piştî hevqas salên mirîtiyê
Piştî hevqas sedemên biyaniyê
Tu tê min fêrî nûbûnê dike
Tu tê min fêrî awayekî din ji girî dike
Di nav destên nazik de
Tîbûna nebûnên nû dikim
Tevgerên te awazên xweda dikin
Nêrînên te bersivên letwanî û awarteyiyê dinişînin
Tu radize… xweda afirandinê radiwestîne
Tu her min bi min dinasîne
Ez her dibim tu
Tu jî tenê hertiştê xweş.