Konê Reş
Di vê pêla dawî de dîwanek helbestvan Hemkoçerê Cezawîr a nû, bi navê (HÊVAN), ku ji helbestên Çarîn anku çar rêz pêk hatiye, di nav xwendevanên zimanê Kurdî de hat belav kirin. Helbestvan daneyek ji vê dîwana xwe bi diyarî ji Efrînê bo min şandiye.
Piştî ku min xwend, hûr di çarînên helbestên wî de ponijîm bi du xisletan derketim: Yek jê êdî nema mirov cudahiya şêwezarî di navbera berhemên Kurdên Efrîn û Cizîrê de dibîne.. Anku mirov têde dernaxîne ka gelo Hemkoçer ji Efrînê ye an ji Cizîrê ye..
Piştî ku min xwend, hûr di çarînên helbestên wî de ponijîm bi du xisletan derketim: Yek jê êdî nema mirov cudahiya şêwezarî di navbera berhemên Kurdên Efrîn û Cizîrê de dibîne.. Anku mirov têde dernaxîne ka gelo Hemkoçer ji Efrînê ye an ji Cizîrê ye..
Bê guman ev yek li elfabeya latînî û kovara Hawara Mîr Celadet Bedirxan vedigere hem jî li bizava rewşenbîrî -tevî lawaziya wê- a ku ji çend salan ve di nav me Kurdên Sûriyê de belav e..
A din ku helbestên dîwanê bi rengê çarîn û şeweyekî hêsan û rewan hatine nivîsandin, bi gotinên kurdî yên resen û têgihiştî, rist bi dûv hev de rêz dibin û dûrî gotinên ferhengî ye.. Eger hin gotinên devera Efrîn di nav re derbas kiribin jî, ez vê yekê ji mafê wî û dewlimendiya wî di zimanê Kurdî de dibînim û wî spas dikim..
Dîwan ji 100 rûpelî ye. 164 helbestên çarîn di nav rûpelên xwe de kom dike, bi çapeke baş hatiye çap kirin.
Helbestvan Hemkoçerê Cezawîr ev dîwana xwe bi vî şêweyî diyarî xwendevanan kiriye:
Silav li civaka me
Li hîn û zikmaka me
Li dûrişm û li alê
Li welêt û li xaka me
Ji bax û gulistana
Ji nav rez û bistana
Ji devera Efrînê
Ji warê daristana..
Mebest wêje û tor e
Riya zimên jî dûr e
Ez negîştim dawiyê
Li çewtiyan bibore
Ev helbesta Koçer e
Ji hest û hişê te re
Ji min de yadîgar e
Ji we re ew diyar e
Ez ji dil vê berhema dostê xwe Hemkoçerê Cezawîr pîroz dikim û bi hêviya berhemên çaktir û bi vê helkeftê ez vê dîwana wî li xwendevanên ziman û afirînerên peyva Kurdî pîroz dikim.
Qamişlo, 05.08.2011
