Di çarçoveya çalakiyên çandî de, yên ku îsal li Stenbola ku weke paytexta çandê ya Ewrupayê hatiye hilbijartin, wê „Perlemana nivîskarên Ewrupayê“ di navbera rojên 25-27.11. 2010 de, mezintirîn çalakiya wêjeyî ya cîhanê lidarbixîne.
Di vê çalakiyê de, ji derdora 27 welatên Ewrupayê, bi dehan nivîskarên wêjeyê berê xwe didin Stenbolê û bi beşdariya dora 100 nivîskarên ku li ser sê komisyonan hatine belavkirin, wê pirsgirêkên wêjeyê li Ewrupa û cîhanê bêne gotûbêjkirin
Ji nivîskarên beşdar xelatgirê Nobelê yê sala 2001ê, V. S. Naipaul wê di roja yekem de biaxive û bi dehan nivîskarên navdar ji hemû welatên Ewrupayê di vê çalakiya navneteweyî de cih bigrin.
Ji nav nivîskarên kurd, wê ji Almanyayê Helîm Yûsiv, herwisa ji Fransayê jî nivîskarê zimanê firensî û esilkurd Seyhmus Dagtekin beşdarî vê çalakiyê bibin.
Li gorî agahiyên ku di malpera parlemana nivîskarên Ewrupayê de hatine dayîn, ev ramana civandina hejmareke mezin ji nivîskarên wêjeyê ji Ewrupayê û anîna wana cem hev di mezintirîn civateke wêjeyî de li cîhanê, yek ji encamên hevdîtina her du xelatgirên Nobelê Jose Saramago û Orhan Pamuk e, ku di 18. Gulana 2007 de li Stenbolê, encam dabû. Ev konfrans jî gaveke ber bi pêkanîna wê ramanê ve.
Agahiyên berfirehtir di malpera European Writers Parliament (EWC) de hene:
