Dîdar: Demhat DêrikîEvîn xan, divê çi taybetmend li cem wan kesan hebin da em bêjin ew(di warê peyv, awaz, starn) hunermendin?
Hunermend ew e yê ku karibe di hestên xwe de afirandinê bike, anku zanibe hez bike û di navbera xwe û hestên xwe de rast be û di awazê de gihayî be ji xemlandina stranê re.
Tu ji rewşa îro ya hunermendên kurd raziyî? Gelo daxwazên civaka kurd ji hunermendan çi ne û hunermend dibin bersiva van daxwazan?
Mixabin ev kêm e, jiber gelek ji wan dimînin di bin bandore Ereb, Tirk û Firsan de. Wek tê dîtin, dixwazin rengê mûzîka kurdî(bê ku haj ji xwe hebin)ji holê rakin. Ji bersivê zêdetir, karek neyînî di civakê de dikin, giyana awaza kurdî kêm dibe û
guhdervanên strana kurdî kêm dibin.
guhdervanên strana kurdî kêm dibin.
Ev dengê xweş, ev awaza xweş ya Evîna Welat ji kû tê? Em dikarin bibêjin bandoreke giring ya çiyayê kurmênc, kanî û sirûşta Efrînê li ser vî dengî heye?
Erê hevalê hêja, ez di nava wan çiyan û newel û şînkayîya Efrînê de hatim jiyanê û bandoreke xwe ya giring li ser min heye. Xala din a giring, bajarê Heleb bajarê mûzîkê ye, warê hunermendê mezin Sebah Fexriye. Guhên wan xurte, ku kesê nizanîbane bistre ew ji civata xwe diavêtin..
Astengiyên di jiyana we ya hunerî de derketîn çi ne û li hember wan helwîsta Evîna Welat çi bû?
Temenê min 9 salî bû dema min dest bi stranê kir, heta îro xewn di hundirê min de dijiyan û dimirin, dihatin û winda dibûn. Gelek astengî li pêşiya min derketin; civakî, aborî hwd. Pir cara min stran dihêla, lê hevalên min ez rexne dikirim û digotin mixabin ev çend sale te li berxweda û nuke bi hesanî tu zaroka xwe dihêle. Bi rastî dema çîroka şerê xwe yê jibo mûzîkê min kirî tînim ser ziman(girî û êş), nema pêşiya xwe dibînim. Lê piştî şoreşeke mezin min elbomeke xwe derxist û ji nûve hatim dinyayê. Her çende ne bi dilê min be jî, ew zaroka di hundirê min de digriya, nuke hatiye dinyayê.
Tu carna di jiyana xwe de poşman bûyî û te gotiye xwezî min ev nekiribane?
Erê, jiyana min tev poşmaniye, xwezî nehatibame dinyayê?!
Dema we dest bi hunerê kir, yên bandor li we kirîn û bi we re bûyîn alîkar kî ne? Ji hunermendan yên herî nêzîkî dilê Evîna welat?
Xalê min û diya min pir alîkarî bi min re kirin, lê bavê min li min qedexe dikir. Ji Dilinya Rezazî, Bilind Îbrahîm, Sefqan, Şeyda, Çopî, Îbrahîm Mihemed Şêxo hez dikim û wan nêzîkî dilê xwe dibînim.
Niha çi proje û planên we yê hunerî hene?
Di serê min de projeya kilîpekê heye û aşopên min di vî warî de bilindin, lê ez ê li berxwe bidim.
Sipas
Sipasxweştir bo vê derfetê
Çavkanî: www.rojnamawar.com
