Konê ReşÎro, 07.06.2015, bi dilekî xemgîn min nûçeya koçkirina nivîskar û wergêr mamoste Ehmed Qazî bihîst.. Ez ji Qamişlo, sersaxiyên xwe ji malbata wî, ji tev gelê kurd li Rojhilat û ji tev rewşenbîrên Kurdistanê re pêşkêş dikim..
Îro, 07.06.2015, mamoste Ehmed Qazî li Mehabadê koça dawî kiriye û sibe 08.06.2015, wê termê wî bi rêûresmekî mezin bê guhestin goristana Gelkoyê Zanayan li Mehabadê..
Çilo min rehmetî Ehmed Qazî naskir? Berî 5 salan, di roja 18-22/06/2010 an de, digel hevalên xwe Derwêşê Xalib, Deham Ebdulfettah, Mihemed Hemekoçer, Nafi Beyro û Bavê Selah, li ser daxwaza parlamentera bajarê Wanê, xanima hêja Gulşen Orhan (Keça mîrê Miksê Nacî Orhan), em çûn Wan û Miksê ji bo 2 mîn Festîvala Feqiyê Teyran. Li hotêla Şahmaran, ez çav bi şanda ku ji rojhilat hatbû, ketim; Ew şanda ku bi serokatiya mamoste Ehmed Qazî bû û ji van kesan pêk dihat: Dr. Qutbeddîn Sadiqî, Eta Nehayî, Kafî Elewî, Bahram Waladbaigî, Xatûn Nesrîn Caferî, Sîmîn Çayçî, Seîdi Qazî, Mohammad Alî Soltanî, Siware Fotouhî, Ehmed Behrî.. û wiha di wan rojan de me hev naskir û çend rojên xweş me bi hev re derbas kirin..
Di wê festîvalê de nivîskar û wergêr Ehmed Qazî, li ser navê şanda kurdên Rojhilatê xweşhaliya xwe, ji bo lidarxistina vê festîvala Feqiyê Teyran anî ziman û diyar kir ku cara yekem ligel zext û astengiya li ser ziman û çanda kurdî, bi festîvalên weha pêşî lê hatiye vekirin. Ehmed Qazî, di berdewamiya axaftina xwe de xwest ku hemû ziman û çand di nav serbestî û demokrasiyê de bijîn û hemû rewşenbîr guhdanê li klasîkên kurdan bikin..
Serê malbata wî, rewşenbîriya Kurdî û gelê kurd sax be..
Ev wêneyê me berî 5 sala ye.
Qamişlo, 07.06.2015
Şîrove (0)