Desteya Sernivîser Weke ku tê zanîn, li 22ê Nîsanê, sala 1898an, li paytexta Misirê, karwanê rojnamegeriya kurdî bi destê nemir Miqdad Midhet Bedirxan bi rêket, û yekemîn rojnameya kurdî bi navê “Kurdistan” hate weşandin.
“Kurdistan” li mişextiyê û dûrî welêt ji dayîk bû û ji ber astengiyên gelek û bê dawî, ew ji deverekê diçû yeke din. Ew rojnamak du heftane bû, bi zimanê Kurdî û tîpên erebî çap û belav dibû, û bi giştî 31 hejmarên wê derketin.
Li nik kurdan, 22ê Nîsanê bû roja zayîna rojnamegeriya kurdî, û her sal, li her çar perçeyên Kurdistanê şahî, seyran, semînar û lêkolîn di wê rojê de têne kirin.
Bêguman, di hişyarbûn û pêşketina miletan de, rojnamegerî roleke pir giring dilîze, ji ber vê rastiyê jî, li welatên bindest mîna Kurdistanê, ew tûşî astengiyên gelek dibe, xêrnexwazên gelê Kurd bi hemû şêweyan tarîkirina dîrok, ziman, çand û doza gelê Kurd armanc dikin, ew jî ustubariya rewşenbîr, nivîskar û alavên ragihandinê ye ku li hember pilanên wan bêdeng nemînin, pênûsên xwe têxin xizmeta doza gelê xwe, û herweha çanda yekrêzî û hezkirinê di civakêde belav bikin.
Bi helkefta 118 salvegera rojnamegeriya Kurdî, em hemû nivîskar, rojnamevan, medyakar û xebatkaran pîroz dikin, û pêşketin û serkeftinê ji wan re hêvî dikin.
Ev e gotara sereta ya rojnama REWŞEN hejmar 16
