Mizgîn Hesko
/ Yek Jîna. Du Jîna û hezarbare Jîna /
Jîna…
Û dubare û hezarbare Jîna…?!
Min vemirînin
Û vaye avdar di rê de
Ji nîv axê…
Tiliyên sava!
Gulnewroz û guljîn
Û kembereke ji keskesorê
Bjina darberûyê himêz dike…!
Û destên min…?!
Destek di bin serê çiyê de
Û yek di paşila zeviyê de
Û destekî din
Bênderek gernijîn
Min…
Platînkên xilmaş
Li dilê bihiştê
Vedigerandin…!
Û destekî ji we ve nexuya
Xurîna tîrêjê û li van joriyan
Bilndahiya darberûyekê
Û heşîn têm!
Û destek…
Û hîn jî destek
Û çend werzên behitî…?
Mijde û mizgînî
Di dergehê sirûdê re
Keskînî û bişkoj der têm!
Dubare û hezarbare
Min vemirînin…
Û bişirînên di çavan de
Xalxalokên elindê
Bi roniyê re hildiperikin
Û bi alayê re disitirînin!
Jîna me…
Siberoja cejnê…
Refek Jîn û li her çar aliyan
Jîn dibim
Jîn dibim û bi xeml û nazeninî
Têm semaya Newrozê
Binefş û nêrgiz
Li ser bejna xakê bişikivîn
Erê…
Her herikîn…?
Û her şev û her bîstik û yekê rojê…!
Jîna me…
Bilndahiya darberûyekê û heşîn têm
Û vaye avdar di rê de
Erê…
Ciwanîka baxên xwe me
Her bejna darekê
Dubare û hezarbare
Dibezim tîşkên dozê.
18. Rêbendana 2024.
