Na ji kuştina jiyanê re!

Şêrîn Ebdo

Silogan gotinek e, ka kirin û pabendiya mirov bi evê gotinê?
Li bin sîwana evê siloganê “Jin jiyan e” jiyan tête kuştin, jin xwe dikuje û tête kuştin!
Li bin sîwana evê siloganê gulên nûpişkuvî di buhara xwe de têne jêvekirin û xemla jiyanê winda dibe..
Li bin siya şuştina rûmetê xencera nezaniyê di sînga jînê de tête çikandin..
Seyr e! Em di serdemeke vekirî û pêşketî de dijîn lê hizir, hiş û ramanên hin mirovan hêj di serdema nezaniyê de çalak in, hêj civaka me di serdema kevirî de dijî.

Çima, ji bo çi, bi çi mafê nêrzayekî hişkufikî fermana kuştina jinê dide û çi yasa maf dide jinê ku xwe bikuje an xwe bişewitîne?

Jin jiyan e, dema ko jin bi xwe mafê jiyankirinê bide xwe, jin jiyan e dema bav, bira malbat, ol û êl mafê jiyanê bidin jinê..
Jin jiyan e dema ko dê baskên kevoka xwe nebirîne û çiqas kevok bilind bifire û rêya vegera xwe winda bike hêlîna xwe li bal dêya xwe bibîne..
Dibêjin û tê gotin ko jin nîvê komelgehê ye û pir caran komelgeh bi xwe ye, dema jinek an keçek xwe dikuje an tête kuştin ew bi tena xwe namire bêguman komelgeh jî pê re tête kuştin û stûnek ji stûnên berdewamiya jiyanê dişkê û bingehek ji bingehên avakirina mirov hildiweşe.
Bala mirov dikêşîne di “Roja jinê ya cîhanî” de hawara nêrzayan ber bi asman ve diçe û bi bilindiya dengê xwe bang dike ” Jin jiyan e” û bêdeng li bin sîwana rûmet û paqikirina rûmetê bi dilekî sar û tije kîn jiyanê dikuje!
Balkêş e, ji destpêka evê salê de 2022an kuştin û xwekuştina jinan bi şêweyekî li ber çav û mezin li nav civakê û bi taybetî li Herêma Kurdistanê zêde bûye, mixabin li hember evan kiryarên kirêt tu hewildan an çareserî nehatine dîtin û ne jî hatine kirin!
Kî berpirs e, li hember kuştin û xwekuştina jinan?
Kî dibe sedem heta jinek an keçek biryara xwekuştinê bide û jiyanê dikuje, kî dizane jî gelo ewê jinê xwekuştiye an hatiye kuştin?
Di hemî ol û yasayan de kuştina mirov, ajal û her tiştekî ko ruh tê de heye gunehkarî ye û kujer divê were sizakirin, li hember vê gunehkariyê ol û yasan çi çareserî peyda kirine?
Rêxistinên mirovî bi giştî an ên taybet bi parastina jinan ko li dijî kuştin, xwekuştin û tundûtûjiya li hember jinê tête kirin çi kirine û çi hewildan hatine kirin ji bo rakirin an kêmkirina kuştin û xwekuştina jinan?
Tekez pir sedem hene dihêle ku bav, bira û êl fermana kuştinê li ser jinekê bidin û pir sedem jî hene dihêlin ku jinek an keçek biryara xwekuştinê bistîne lê li bin çi rewşê û sedem an fişarekê de be nabe mirov xwe bikuje an were kuştin.
Hin caran nezanî, bêhişyarî an bêhizirî dibin sedem ko mirov di kêlîkeke de rêya rast winda bike û têkeve şaşîtiyan,
Girîng e civak, yasa, ol û rêxistinên mirovî û kesên ko li mafên jinan xwedî derdikevin û diparêzin çareseriyê ji evê pirsgirêkê re peyda bikin ji ber ko kuştin û xwekuştin ne çare ye û ev rûdawên han ber bi zêdebûnê ve diçin û cihê metirsiyê ye ko hêj bêtir bibin.

24.05.2022

شارك المقال :

Leave a Reply

Your email address will not be published. Required fields are marked *

اقرأ أيضاً ...

Tengezar Marînî

Weke her car Jan Dost dilê me li xwendinê vedike. Werine baxê Romana wî ya nû.

Şahşopa Jan Dost: nêrîneke Wêjeyî li ser Şer û mitaleyên serkirdeyekî

Romana Jan Dost * Şerê General yê Dawî* berhemeke bihêz e ku bi kûrahiyeke balkêş…

Şîlan Doskî

Helbesta Çima! ya Nivîskar Ezîz Xemcivîn wekî pirsgeha xwedî hest û dîmen, di nava wêjeya kurdî de derdikeve. Ew pirsên ku helbest dikare ji xwe bike: “Çima ez hîn jî hebûm?” û “Çima jiyan bi awayekî tê girtin, lê divê ez bimirim?” Helbest wekî tîrêj di deriyê xewnan, hest û…

Ezîz Xemcivîn

 

Kesayetiyeka ko pir gotûbêj li ser çê bûne, pir gotegot wek pencereyekê li ber hemû bahozan vekirî be…

Dixwazim çend gotinan ji bo dîrokê derbarê evê kesayetiya Kurdperwer û hezkerê welatê xwe pêşkêş bikim…
Seydayê Tîrêj ji min re got: „di mirina Xweda ji wî razî be têkoşer Hecî Mihemedê…

Qado Şêrîn

Ji bo kurd bêtir tarûmar, winda û tune nebin, tenê yek rê li pêşiya wan maye, ew jî dewletbûn e. Eger ji aniha û 20-30 salên bên kurd nebin xwedî dewlet, wê winda bibin, wê bêtir rastî hilweşandin û şikestinan bên, wê hêviya dewletbûnê lawaztir bibe, çimkî wê kurdperwer û…