Ebdilmecît Şêxo
Tu û Hêvê hevalcêwî ne
Çiqas ez li we herduyan
Dinêrim
Yara min!
Tu bi tenha xwe
Êşên min
Di agirdana dilê min de
Dişewitînî
Awirên çavên te
Nesrînên çelmisî di çavên min de
Av didin
Lêvên gulgulî di henarokên
Min de diçînî
Hêvê !
Lê tu carna melul î
Herdem tu lal î
Ne dikenî
Tu maçekê jî nadî min
Û ne helbestên Mileyê Cizîrî jî
Ji min re dixwînî
Yarê !
Lê awazên kenînên te yên narîn
Pêlên hestên min
Serxwaş dikin
Tu û Hêvê hevalcêwî ne
Lê te dilê min xistiye çiqina
Dilê xwe
Bi ronahiyên çavên te
Bi stêrên çavên te
Şitlên darên Zêtunê
Di çavên min de sernûve
Zîl didin
Û biliiiiiind dibin.
Hêvê !
Li min bibhure !
Ez neşêm te û Yara xwe
Tayî hev bikim
Xwîşka te
Min di dergûşa lêvên xwe de
Dike xewê
Ewa di hembêza min de
Dibe şepalek şeng
Li ber awaza dilê min
Semayê dike
Straneke xwe ji min re
Dike balîv
Çîrokeke xwe ji min re
Dike nivîn
Lê xwedêkê tu li wî ezmanî
Çi dikî ???
Baweşînên bêhngulî
Ji nav pêlkên Yara min
Di sibehan de min ji xewê
Şiyar dikin
Hemû xewnên reş
Li sêdarê dixînin
Lê ez jî xûrîniya xwe
Bi ramûsaneke dirêêêj dişkînim
Hêvê!
Tu û Yara min tayî hev nabin!
Herdem ewa şepalek şeng e
Di hembêza min de
Semayê dike
Lê tu çi dikî Hêvê ?
Yara min di bin sersiya
Dara Zêtunê de
Li ber gornên pakrewanan
Peyvên min li teşiya welatê xwe dixe
Devên birînên dayikan
Bi maçkirinên xwe derman dike
Lê tu çi dikî?
Ez bi dûşava lêvên Yara xwe
Janên bajarê xwe derman dikim
Gulan di nav pîsîrên
Jinebiyan de diçînim
Bi evîna Yara xwe av didim
Lê tu çi dikî?
Ez peyvên xavî didim Yarê
Ewa ji min re
Ji xûnava porê xwe
Helbestekê diyarî welatê
Mem û Zînê dike
Were ! Were !
Ji ezmên were
Cem hevalcêwiya xwe
Û herdu dilan li hev
Pîroz bike !
Efrîn,2021
