Salar Salih
Jiber ku Hesekê bajarek pir reng e, ew bi pêwîstî parastina hevjiyana aştiyane ye, pêkhatiyên têvel ji netew û ol û tîreyên cuda lê dijîn, li Hesekê Kurd û Ereb û Suryan û Aşûr û Kildan û Turkman û Ermen û Mislman û Xiristiyan û Êzîdî û Sunna û Şî`a ji mêj ve bi hev re dijîn, lê di van rojên aloz de ji dîroka Sûriya ev jiyana hevbeş di bin gefan de ye, çiku ewlekariya Rêjîmê bi berdewamî hewldide ku navkokiyan di navbera pêkhatiyên bajêr de bi-afirîne û nûçe û saloxdanên sexte di nava gelên Hesekê de belav bike,
ji rexekî dî ve metirsiyeke din van rojan rûdide, ew jî gefa êrîşên komên tîrorêst û tundrew ên bi navê Daiş tên naskirin, ew jî gefeke mezin li ser kêmolên bajar çê dike , ku di fermanên wan de çi kesê ne muslman be yan divê cizyê bide û yan divê ji bajêr bark e, ev yek dûrî sincê mislmantiyê û mirovahiyê ye , û dûrî rewişt û gerdişên şîniyên bajarê Hesekê ne ku ji mêj ve jiyanek aştiyane li gel hev dibuhurînin.
Litev van metirsiyan û rewşa aloz ya bajarê Hesekê ku di dijwartirîn mawe de ji dîroka xwe dijî, lê jiyan li Hesekê hîn berdewam e, raste ne wekû beriya ku şoreşa Sûriyê destpêbike, wê çaxê bazara Hesekê û xwaringeh û parkên wê ta piştî nîvê şevê bi jiyanê tije bûn, lê niha ew di asteke pijirandî de ye, herçende pêkhatiyên Hesekê hîn bawer in bi hevjiyana aştiyane ligel hev, û wan ew navkokî û arîşeyên ku rûdidin dûrdixin ji jiyana xwe ya rojane, ew bigiştî dûrî veqetandina li ser bingehên nijadperestî an olî an tîreyî ne , û dixwazin ku jiyana xwe ligel hev bi tebat û tenahî biqedînin, ji layekî dî ve çalakvanên civaka sivîl xemsar in di vî warî de, çiku ji wan tê xwestin di rewşeke weha de ku bi erkê xwe rabin derbarî şirovekirina giringiya hevjiyana aştiyane, û belavok û çapemeniyan bi vê mebestê biweşînin.
