Mensûr Cîhanî – Derbarê paqijkirina etnîkî ya li dijî gelê Kurd li bajarê Helebê ji aliyê hêzên hikûmeta Sûriyê ve, Mesûd Barzanî got: Paqijkirina etnîkî û nijadî ya li dijî gelê Kurd sûcekî li dijî mirovahiyê ye û dê encamên wê yên karesatbar hebin.
Hêzên hikûmeta nû ya Sûriyeyê, ku ji bermahiyên Partiya Bees a Sûriyeyê, hêzên koma terorîst a DAIŞê, û her wiha tundrewên cîhadîst pêk tên ku di dema hebûna DAIŞê li Sûriyeyê de ji Kurdên wêrek û şervan ên Rojava li bajarê Kobanî û deverên din ên ku Kurd lê dijîn zirareke bêberdewam dîtin, di çend rojên borî de li bajarê Helebê dest bi qirkirina Kurdan kirine.
Mesûd Barzanî, kesayetiyek siyasî yê navdar li Herêma Kurdistanê, nîgeraniya xwe li ser rewşa mirovî ya krîtîk û karesatbar li taxên Kurdî yên Helebê anî ziman û peyamek taybet li ser vê mijarê nivîsand, ku nivîsa tevahî li jêr e:
Bi navê Xwedayê mezin û dilovan
Guhertinên siyasî yên li Sûriyê derfeteke baş bû ji bo dîtina çareseriyeke guncaw ku mafên rewa yên gelê Kurd li Sûriyê bên berçavgirtin û hemû pirsgirêk jî bên çareserkirin. Ji bo vê armancê, me bi hemû aliyan re gelek hewl da ku divê hemû kêşe û nakokî bi rêya diyalogê û bi awayekî aştiyane bên çareserkirin.
Lê belê ev rewşa metirsîdar û şer û tundûtûjiya ku niha li bajarê Helebê heye, cihê gelek dilgiraniyê ye û metirsî li ser jiyana xelkê sîvîl û welatiyên bêtawan çêkiriye û gefa qirkirina etnîkî li dijî Kurdan li wê deverê heye.
Daxwaz ji desthilatdarên Sûriyê dikim ku nakokiyên siyasî nekin nakokiyên neteweyî û neyê hiştin ku welatiyên Kurd ji ber van kêşe û pirsgirêkên li herêma Helebê, rastî zext û tundûtûjiyê, derxistina ji cih û warên bav û kalên xwe û qirkirina etnîkî bên. Herwiha daxwazê ji aliyên Kurdî û bi taybetî (QSD) dikim ku çi ji destê wan bê bikin ji bo rawestandina şer û pevçûnan û rêgirtina li xwînrijiya zêdetir, û herdu alî jî ji bo çareserkirina pirsgirêkan, kar ji bo girtina rêya diyalog û gotûbêjan bikin. Nabê hebûna nakokiyên siyasî bibe sedema wê yekê ku jiyana xelkê sîvîl bikeve bin metirsiyê û qirkirina etnîkî li dijî gelê Kurd rû bide, ev tawanek li dijî mirovahiyê ye û encamên metirsîdar dê ji wê derkevin.
Mesûd Barzanî
07.01.2026
Şîrove (0)