Fewaz Ebdê
Min dît
Pezkovî
Bi pênûseke ji qiloçên xwe
û ximaveke ji toza rê
namekê li hewa dinivîse.
Demê xwe di bêrîkeke asîmên de veşartibû
Daran xwe fêrdikirin
çawa bigirîn
bêyî ku yek pelî biweşînin
Ne Siyamend bû li wir
lê rengvedana nigê wî bû
li ser zinêr pîkolî dikir
Lew;
Çiya
gavên wî
bêhtir ji navê wî
bibîr tîne.
Xecê
Li ser desmalkeke ji bêdengiyê
hêsirên xwe qenewîç dike
û bi dengekî zîz
ji Pezkovî re nehwirîne
Derdor li ber dengê wê
bêdeng dimînin
xwe dadixin da ku erdê ramîsin.
Lê
Pezkovî bi kêferata dawî re
Herdû nigên pêşê xistin
û mîna perîkekî
ew di zinêr werkir.
Li vir
Li ser zinaran
Pezkovî çipp rawestiyaye:
Peykerek ji bêdengiyê
Di çavan de;
Qapaniya Siyamend
û hewara Xecê ya nîvkuştî
reng vedane..
