Kawa Nûrî Seydê
Va ez hatim ji xerîbiyê piştî bîst û sê salan
Ez hatim li gora te bikim serdan
Ma ne besin sî salên te li gel yazdan
Te kiriye hevaltiya perî û pêxemberan
De rabe ey qehraman
Tenê rojekê li min bibe mêvan
Ez ji te re bêjim çîrokên xwe û serhatiyan
Ez çi bêjim bavo can
Piştî çûyîna te, ez mam bi tenê li van çolan
Sêwî, perîşan bê te ey stûnê malan
Jiyan li dû te bû barekî giran
Min barkir û ez çûm yûnan
Dem bihurî û ez gihîştim welatê alman
Min keçek çêbû wek te welatparêz û ciwan
Ez çi bêjim bavo can
Kurda ji bo welat kirin raperîn û serhildan
Çeteyên dagirker Konên me dan ber şûran
Bi top û tankan ajotin li ser me bêkesan
Kal derketin pêşiya xortan û li ber xwe dan
Bi mêrxasî kirin tekoşîn li hemberî êrîşan
Tiştî herî erzan bûye xwîna însan
Ji dîwaran xistin xwarê hêma û nîşan
Ji nûve kuştin şahmaran û destan
Qedexe kirin lêxistina zingilên dêran
Mizgeftan bilind kirin dengê nimêj û azan
Melayan kirin bang ji bo qirkirina me Kurdan
wêrankirin pîrozgehên me rojperestan
Hilweşandin tirb û şewitandin termên miriyan
Gelek malbat neçar û bêçare man
Koç bi rê kirin dîsa û bi dizî bazdan
Belav bûn wek keriyên bê şivan
Tu mayî bi tenê tev zeytûnan
Qet mexe ti kovan û xeman
Metê di cihê xwe de ma wek şêran
Av dide tirbên bav û kalan bi dilopên çavan
Dayê min binaxkir li wan welatan
Dişîne ji te re silav û ramûsan
Rabe min hembêz bike ez bi qurban
Em derbas bibin li ser xizman û bikin pirsan
Em bikin seyran û bigerin li ser van gundan
Mîna berê tu bidî ders û fêrbikî ziman
Şagiritên te li benda tene li dibistan
Ey rêzan û rêberê nifşan
Ez didim te soz û peyman
Ez careke din dernakevim ji çiyayên kurdan
Ez ê cot bikim bax û bistan
Ez ê biçînim li ser gora te şilêr û binefişan
Şîrove (0)