Hejmar 6 ya kovara Dîwar derket

 Edîtorê kovara Dîwar, hejmara nû, bi van peyvan ji xwendevanên kurdî re pêşkêş dike “Bi vê hejmarê re em nîv salê li pey xwe dihêlin. Me xwest ku em di riya mijara xwe ya sereke re vê carê balê bikişînin ser çîroka kurdî. Ji bo vê yekê me rê da sê nivîsên cuda. Yek li ser çîroka ku bi zaravayê kirdkî an kirmanckî tê nivîsandin, ya din li ser çîroka ku bi kurmanciya jorîn tê nivîsandin, çîroka Rojava wekî nimûne û ya dîtir jî li ser çîroka ku bi zaravayê kurmanciya jêrîn an soranî tê nivîsandin û bi zimanê yek ji nivîskarên vî zaravayî.” Nivîskarên ku beşdarî  mijara sereke bi çîrok û nivîsên xwe ev in:

Roşan Lezgîn- Zana Omer -Eta Nehayî -Narîn Omer- Fahrî Ayhan -Newaf Mîro -Azad Dilwar -Mehmet Şarman -Luqman Silêman- Mehmet Yildirim Çakar
Girêdayî wê, hevpeyvîn bi yek ji nivîskarên sereke yên çîroka kurdî Hesenê Metê re, heye. Wekî hemû hejmarên din, di vê hejmarê de jî gotar û nivîsên li ser wêje û çanda kurdî cih digirin. Çiya Mazî li ser çanda aşiqan yan jî mitirban û Hesen Dewrêş li ser  bêzimaniya ketiyan nivîsandine. Di beşê wergerê de, Cewad Pale çend nimûne ji berhemên  hostayê wêjeya farisî Ehmed Şamlû wergerandine kurdî. Ji bo portreya mehê jî çîroknivîsê kurd Yakob Tilermenî ji bo vê mehê hatiye hilbijartin.
Hêjayî gotinê ye ku Dîwar bi awayekî mehane ji sere vê sale de dest bi weşana xwe kiriye. Edîtorê kovarê Helîm Yûsiv e, berpirsê nivîsan Cemîl Oguz e û berpirsiyarê giştî Agirî Soran e.