Mizgîn Hesko
Di wî dergehî re
Rê û rêwan pirr in?
Riya ku divim
Herî dûr pê ve biçim
Min…
Ber bi lalezaran ve
Ber bi dilê Zagrosê ve dibe..!
Ji wir…
Rê ber bi keskîniyê ve diçe
Xaka min ya pîroz e.
Darhinarên ji memikên Mediyayê
Ciwanî vexwarî
Niha û di werzên gihiştinê de
Dêm sor û dirihayî ne…?!
Darzeytûnên bi xwîdana hezê
Avdayî
Niha û li qeraxên tarî
Wekû stêrên ji xemlê xwe
Diihêwirin…?!
Şînokên me ne
Ev çîçekên boz û nazdar
Fîdanên Kurmênc in
Û sebetên berxwedanê
Ji bayê azadiyê re
Vekirî dihêlin.
Ji wir…
Rê ber bi keskîniyê ve diçe
Xaka min ya pîroz e
Xaka Sîmirên
Ku ji tovê rojê
Firişk nabin
Bilind û bilind difirin
Û ji hilma axê
Dest venabin.
Xaka ahûyên nûhatî
Ku li aliyên birînê
Xwêsiya demsalên nehatî diçêrin
Û herî dawî…
Di riyên bendemanê de
Gezoya pêdariyê dimijin…?!
Xwe bi yariyên zinaran ve
Jibîr dikin
Û guhanên çiyayên berxwedêr
Jibîrnakin.
08.12.2024
