Gurgan Elhac
Xewne ev yan ez şiyar im?!
Çûye payiz hat bihar im
Nav binefş û bin nizar im
Nav bihiştek av û dar im
Nav gulîstan û parêz im
Nirgiza min li hembêz im
Li ber bejnek xeml û xêz im
Li ber mêrg û dêm hinar im
Navçîmen wek du zarokan
Ser şaxan wek du firokan
Li spihir mina du rokan
Ez û evînê û yar im
Ji nav xaran di pişkivê
Gula evînê dilivê
Ji nav dil ser rexle şivê
Divim sînga xwe lê darim
Çav li geşta di derya ye
Dilê min bi du perya ye
Ji du ezmanan werya ye
Ser pelên ewran siwar im
Ez û vînosê serbest in
Bade noşî nû sermest in
Ji evînê ranawest in
Nû di zanim bextewar im
Nû min kêşa hilma evîn
Nû min çêja tama şîrîn
Nûka da min germa hêlîn
Pişt li kovan û azar im
Nû li min xist ronya firişt
Nû bi minre kenî sirişt
Kasê lêvan fûrîne mişt
Nû bi felek ez dikar im
Qamişlo…5/4/2000
Şîrove (0)