Efrîna min! Girî li bejna te netê

Ebdilmecît Şêxo

Tevî bêzariya te
Tevî êşa te
Tevî qêrînên dîwaran
Tevî girîyên kavilan
Tevî qêrînên derguşan
Tevî axînên darên kokbirî
Girî li bejna te netê
Efrîna min !

Stêrên çavên xwe
Ji rojên zemawendên bûk
û zavên  xwe re veşêre !
Agirên Pêlên evîndarên te  
Awirên neyaran di landikê de
                                       Dişewtînin
Girî li bejna te netê
Efrîna min !
 
Îro Newroz e
Li gelê Kurd
Û Ferhan
Mihemed
Nezmî
Û Mihemed Fereh   
                         pîroz e
Girî li bejna te netê
 Efrîna min !

Cindirêsa min !
Helebce xûşka te ye
Silêman Adî birayê te ye
Kurdistan dayika te ye
Mesud Berzanî serokê te ye
Girî li bejna te netê
Efrîna min!

Newroz nîşana serkeftina te ye
Newroz nîşana pêdariya te ye
Lîliyên dayikên  pakrewanên te
Xemlên te ne Cindirêsa min
Girî li bejna te netê
Dilbera min
Efrîna min !

Efrîn

     21.03.2023