XWENDIN JIYAN E

Şiyar Silêman

Bixwîne, bixwîne
Xwendin jiyan e
Bixwîne, bixwîne
Xwendin giyan e
Ji bona her mirovî

                  Xwendin can û rewan  e
Hevaltiya pirtûkê           
                   Bo jîna me derman e
Dost û yara herdem e    
                   Civanê wê seyran e
Dostê wê her zana ye     
                    Yê jê dûr e poşman e
                     ******
Pirtûk raza jînê ye          
        Nîvişkê serboran e
Mirov bi çi tê nasîn?        
        Tenê bîr û raman e
Zanîn taca zêrîn e          
           Bi xwendinê pêkan e
Zanîn avedanî ye
           Meydana xweşmêran e
                     ******
Kesê mejî ava be
               Ew lehengê zeman e
Serî qet naçimîne
                   Dilêr û qehreman e
Serfirz û azad e
                   Xwedan navê giran e
Wateya vê jiyanê
                 Azadî`w serhildan e
                ******
Civaka pir xwenda be
           Pêşketna wê hêsan e
Sitemkarî jê dûr e
          Herdem şên û avan e
Civaka bê xwendin be
          Warê derd û êşan e
Xizanî û nezanî
          Cêwiyên ne cuda ne
Bixwîne, bixwîne
Xwendin jiyan e
Bixwîne, bixwîne
Xwendin giyan e

09/02/2021

https://www.facebook.com/shiyar.hemo/posts/2240361156097256