Rêwiyo Xatir Nexwaze

Şiyar Silêman

Rêwiyo xatir nexwaze
Xembaro xatir nexwaze
Bila çavê me nankoran
Şev û rojan qet neraze

Civakek bê ser û ber e
Serfirazî ne gengaz e
Em şayistên vê rewşê ne
Çermê me wek yê beraz e
Ji serboran em hîn nabin
Bilindiyê ji me nexwaze
Rêwiyo xatir nexwaze
Pêncî salî te berhem dan
Beste û awazên ciwan
Tev hejarî û kul û derdan
Li ber avê me tev berdan
Rêwiyo xatir nexwaze
Keryê pez ê bê şivan in
Piraniya me nezan in
Nêçîra gur û dizan in
Wateya jînê nizanin
Rêwiyo xatir nexwaze
Şivanên me bêjimar in
Dijî hevdû her li kar in
Bê biryar û tar û mar in
Li gora dilê neyar in
Rêwiyo xatir nexwaze
Van qeşmeran em pîr kirin
Xwîna di damar tîr kirin
Bextê me reş wek qîr kirin
Bê ra û bê tevdîr kirin
Rêwiyo xatir nexwaze
Hunera te pir bilind e
Dê bimîne her di dil de
Roniya te mûm û find e
Gel bi te tim serbilind e
Rêwiyo xatir nexwaze
Vehêse dilsozo raz e
Huner bi te serfiraz e
Cihê te yê murxê baz e
Evîna te di dil saz e
Rêwiyo xatir nexwaze
26 /12/2020

https://www.facebook.com/watch/?v=1016285395560810