Ronî ELÎ
Dil …
Siwarê Xunava sibehê ye
Bê Şûr .. Bê Mertal
Awazên Çivêkan
Li dêmên Gulan .. Dang dike
Û di kevanê keskesorê de
Helbesta jînê
Dinimîne û dipejirîne
Dil …
Kişwera civateke lal e
Di bin sîbera
Girjenîngên welatekî bê sînor de
Serjimêriya xem û hêviyan
Di gewriyeke telîz de
Terxan dike
Û birêve dibe
Dil ..
Zilx û mertala tîrkevanên Ahînan e
Bi şev
Çîrokên rojê dişopîne
Di rojê de jî
Xewnên şevê dûbare dike
Û di xwîna xwe de
Siwarên hêviyan
Li ber dergehên şeydê
Vedgevizîne
Û cardin .. Siwar dike
Dil ..
Kendaveke sergirtî ye
Bi lehiyên qelaştî re
Kovanan vedpincirîne
Û di devê birînên demê de
Ahîn û sawirên jiyanê
Diklê û werbêj dike
Tenê ..
Ji ber devê talanan
Stûnên hebûn û dûmandinê
Di bin konê xewnan de
Serast û piştgir dike
Dil ..
Deriyekî bê dergevan e
Mendalekî dîn, kor, lal û ker
Û sêwiyê li ber dîwaran e
Di germa Havînê de
Kunemoza wêranê
Li siha vehsana hêviyan derdike
Û di çeleyê Zivistanê de
Li ser qaqa bêzariyê
Xewnerojan vediqetîne
Û hîn jî..
Sirûda ji te hezdikim
Serast û ezber dike
Dil ..
Dergûşekî lal e
Û di landika paşerojeke dîn de
Ken û girî
Bi dilopên şîrê Dayikeke bê bir re
Mîna dîlaneke bê serpêşvan
Ku li ber Dahol û Zirneyeke xemnak
Germ dibe .. Gur dibe .. Sar dibe
Û ji nişkê ve
Weke tizbeheke
Ku bi tayekî xav hatibe girêdan
Şerpeze dibe
19112016
