Carnan

Kamran Simo Hedilî

Carnan
ez gêrîlayê pêşî
yê cîhanê me
roniya Manî
wekheviya Mazdak im
carnan wêneyên şadiyê

carnan awirên bêkesiyê
di asîmanê çavên min de dicemidin
carnan tofana çiyayê asê
çirûska hemdem
Zerdeştê kal im
carnan gula di guldankê de
bêav mayî
ciwanê bayê windakirinê
baskên xortaniya wî şikandî
di nav melûliyê de
kenê girî me
carnan qêrînên Rindîxanê
hevokên êşê
serê kurê di tûrê dagîkeran de me
carnan helbestvanê xeyalperest
loriya helbestê me
carnan derdê bêxemiyê
sibehên min dikê êvar
û carnan rûkeniya bûk û zavan
tawanbarê bêtawan
hêviya hatinê me ez