Emer Îsma`îlDema ez û herdu hevalên xwe di roja 17/4/2011 ê ji zêndanê serbest hatin berdan .Li ber deriyê zêndana Qamîşlo cemawerekê boş ji nivîskar,rewşenbîr,siyasetmedar û mirovên kurdperwer pêşwaziya me bi germî kirin,di nav wan de jî hevalê min yê hêja mamosta Mosa Zaxoranî berhev bû ,piştî silav da ji min re got : ( Hevalê helbestvan û zimanê kurdî zêndana te û derketina te pîroz be ) û em bi hev re di gel mamosta Elî Cizîrî û herweha mamosta Sefîn Mîranî û mamosta Si`ûd Mela hatin heta Dêrika rengîn .
Di rê de bavê Gulê wek tê nasîn, bi hestekî kurdayetî tenik û bilind pesnê xebatkar û zêndaniyan vedida .Vêca ez gotina te li bîra te tînim û di bêjim bavê Gulê, mamosta Mosa Zaxoranî zêndana te jî ji bo azadiya gelê Sûriyê bi tevayî û ji bo serketina gelê kurd bi taybetî pîroz be .Hevalo…dema mirovê xebatkar bi bîr û bawerî kar û xebatê dike ji bo mafê miletekî bindest hember rijêmekî zordar û kevneperist wê zilim û zordariyê bibîne,hingî nextê azadiyê,eger ne xwîn be û wêrankirina gund û bajaran be ,bê guman wê zêndan be .Hevalo…ez zanim zêndanên rijêma Ba`as çiqas zor û zehmetin,ji ber sê caran min ew yeke derbas kir ye û ew derd kêşandiye.Lê belê çiqas zor be jî,ew ji bo çavên zarokên Sûriya û yên kurdan erzane,ji bo azadî û mafên mirovatiyê erzantire.Vêca zêndana te pîroze û derketina ji zêndanê û hemî zêndaniyan roja welat ronahî dike.bijî zêndaniyên xebatkar û têkoşer,ew mîna şêran jiyana tal û zehmet derbas dikin,ji bo çirsandina roja azadî û bingorkirina rijêmên kevneperist, û avakirina welatekê demoqrat û serbixwe, hemî kes tê de di maf û erkan de wekhev û hevpişk bin.
