Xwatirxwestin *

Salih Cefer

Dîsa wekî her car ketim nav xem û xeyalên xwe yên belav kirî
Di quncikên tarîde gerîyam

Matmayî mam
Bê bersîv mam
Li dora xwe gerîyam
Ev çi xwatirxwestinê
Ev çi koçkirine
Ev çi nişkavkirine
Lê dizanim
Her ku  xewn û xeyalên min dûrî talan û bêmafîyê dikevin
Her ku dilê min ji xemgînîyê bêpar dibe
Her ku gulên westîyayî di henavên min de berve geşbûnêde diçin
Her ku hevîyên min yên şekestî ber  bi asîmanan de difirin
Her ku xeweke bê tirs dibe mêvana hestên min
Ez li ser dengê hawareke dilsotinî di xerîbîya xwede digevizim
Di nav rojên ji rengê xwînê sorbûyî, rengên hestên xwe wenda dikim
Û dibêjim :
Gelo çibû? kê xwatir ji me xwest û dê kî ji me bixwaze ?
De, win bi heqê wan rojên bi ked û westabûnê xweşbûyî vê yekê li me nekin
De win bi heqê wan hestên bi bîrînan dagirtî vê xerîbîya me dijwartir nekin
Em li benda wê rojêne ku disa wan kul û derdan
Li welat careke din bi hevre pareve bikin
Bi germîya wan rûniştinên di ciyên tarî de sarbûna xerîbîya xwe germ bikin
Salên xerîbîya me dirêj dibin û winjî bi lezin
Ne em kanin ji dest brûsk û ewr û tavên hovane bigin we
û ne winjî kanin li hember neheqîyê dilê xwe aram bikin
dilê we û sirgûnîya me li benda dîtina hevin