Xewn û Avdar

Azer Osê

diyarî hevalê Nezîr Melle

Vê sibehê,
xewn,  xwedanê min dibû

Bi vê xewnê,
li cihê min, avdar diza 
û  bi ciwanî tevna vê xewnê,
dirêsa.
Di vê xewnê de,
helbest afirî
xew revand
Hêlîn hişyar bûn,
çûk firiyan.
Û
demsaz dihatin
li ser vî dilî,
bûn mêvan.
 ……………
te jî! rihet rihet, mîna baraneke nerm,
û bêhneke xweş,
li dergahê dilê min dida
û tû dihate  xewna min
lêv liviya mizgîn da
û li ser giha daweta
hêsrên min gerya.
Zindî dibûm,
û
di nîgaşê min de,
pirsa ku bikim ne dima
gazina ku bikim ne dima.
………………………
Te bi dilekî tenik,
mîna dilê miyî birîndar
banî min dikir,
ez jî ji kêf û hêrsa xwe
ber bi te ve dihatim
di wê xewnê de, 
evîndar tev komdibûn,
û ji  eşqa wan,
aşiq dibûm
pêlên wan li min didan
û
canê min, tenûra nanê wan dima
û hîna jî min bêriya wan
û bêriya şewata arê eşqa wan dikir
û………..
bêriya te, 
berya amûdê
min dikir,
bêriya bazdan û meşa li çolan dikir
bêriya wan sibehên xweş
û
şevbuhêrkên şevên wan payîzan min dikir
min xwe mîna xwe dixwend
û te jî mîna te  dixwend
di vê xewnê de,
kanya evînê der dibû
û mîna xwe lê dibanyam
vê xewnê   kirasê
Aso dipîva
û diyarî Sîpanê dilê min dikir
……………..
te!  di vê xewnê de, 
dilê xwe disparte min
û min, mîna xwe, û xewna xwe,
ji te hez dikir
Min dipirsî û ji te dixwest?
tim mîna vê xewnê,
te bibînim
mîna vê xewnê, te bi nasim
û tû jî mîna min,
mîna buhara xewna min
nêzî dilê min bibî.