ROZ

Xemgînê REMO

Hênik-bayê vê sibehê
Bêhna bîhok û hirmî yan
Sêv û hinar û berû yan
Ji paş çîyan
Bi xwere tîne …
Ev çi raze roz …?
Dîsa pêlên bêhrî kirina te
Dilê min
Di sotîgeha tenahî yê de

Toz û zingara xew-giranî yê
Jê di weşîne
Roz ….
Bawer neke ku razabûm
Heta bi şeva bûrî jî
Di xewnê de
Tilîyên min
Wek pezkovî yên birçî
Di nav zinar-memikên tede
Diçêrîyan .
Roz ….
Eva hatim ..ez têm
Û ezê bêm
Ji nû geş-agirekî zerdeştî yan
Li ber çongên te
Ezê vêxînim …
Daristana sênga te
Bo min buhar û hêlîne
Li ser lêvên te
Navê xwedakî mezin
Ez dibînim
Û şîn-çavên te
Du pirtûk ên pîrozî ne
Rû pelên Zendavîzta û
Avezta ez têde dixwînim …
Tenê ji şêrîn kanî yên xwe
Bide min ava serxweşî yê
Û dîsa bo min bibe
Dayîka Emê Gozê
Ezê deşt û çîyan bihejînim ….
Roz ….
Eva hatim ..ez têm
Û ezê bêm
Hestî yên gelyê Zîlan
Di tûrikekî xînim
Û li ser pişta xwe
War bi war bi gerînim ….
Çira yên di gola Wanê de
Vemirîn
Divê ji nû vêxînim ….
Fireh-govendekê li Dêrsimê
Bigerînim
Û efsaneya Agirî
Dîsa vejînim ….
Roz …
Xwe ragire
Eva hatim
Ez têm û ezê bêm …….