SIPASÎ Û OMÎDEWARÎ

Her çendî helbesta min , li gor pîvan û helsengandina lijneya rexneyî di rêza pêşîn de cih girtiye , ez spasiya wan dikim û dilsoziya xwe bi peyva kurdî re nûjen dikim , û ew ciwantirîn xelate bi singa min ve tê daleqandin , heta ji destê min were ezê jiyê xwe di ber parastin û pêşvebirina hestên kurdewarî bi zimanê xwe yê makî li banî bilind hilsengînim ,min divê bêjim ku her çendî helbesta min çaktirîn helbest bû , lê ez bi xwe ne jîrtirîn helbestevanim , helbestevanên kurd yên xwedan hestên tenik bi dehan hene ku karibin gotinên bedew û ristên qeşeng bihûnin û birêsin .

Xelata mezin , ew xelata miletê mirov bi singa wî ve daleqîne . bi hêvîme di paşerojê de fersenda her helbestevanekî di wergirtina xelatê de hebe .

Di vê biwarê de min dive bêjim ku rola her nivîskar , helbestevan û wêjevanê toreya kurdî , kevnetor û pêmaya gelê me , dayik û bavên miletê kurd  , bi bandore û hîkariya wan di berhema min de heye , ew jî mîna serhatiya cotarekî ka çawa di çar demên salê de , bi westan , ked û bizava xwêdana xwe , di werzê havînê de keda xwe dike arvan û dighîne ber destê nanpêjekî yan tenûrvanekî , îro belkî ew nanpêj ezbim , min jî bi qasî karîna xwe hevîrê xwe stirha û li ber devê koziya tenûra şarandî rawestiyam , ew tenûra ku çavê pêxemberê jiyana nuh (NUH) li bendewar mayî da ava jiyanê careke din ji vî welatî biherike û bibe barov û fermana vejîna jiyanek bê êş û azer bi afirîne , min hevîrê xwe bi wê tenûrê ve da  , bi omîdim nanê min ne şkeva be û li gor tam û çêja we here , bila noşîcan be ji bo hezvanê jiyana bi rûmet re , Bi hêvî me ku çalakiyên wêjeyî bi firehî li darkevin û ahingên serketî bi bestin û hemî beşên torê bi xwe ve girê bidin , ne tenê di warê helbestê de teng bimînin û pînosên zêrîn ji diwêta wêjeya kurdî vexwin û hevokên babetên hêja bi afirînin û pirtûkgiha kurdî dewlemend bikin .

Dupat : ez spasiya hemû rewşenbîr û helbestevanan dikim û bi taybet çi kesên di riya telefon, Email , name , êkser  û ragihandina malperan , ev xelata mehrîcanê li min pîrozkirîn .