Yekşema buhurî, ji seet 00.30 ve, hin kesên nediyar dest bi êrîşên li dijî Malpera Amûdê kir. Hewildanên wan berdewam kir ta ku ew seet 16.26 bi ser ketin û karî derbasî beşekî ji Malpera Amûdê bibin.Di encama êrîşê de kesên ku dixwest serdana Malpera Amûdê bikin, dihatin şandin bo malpereke propagandayê ya Tirkên faşist. Wekî din êrîşkeran nekarî ti ziyanê bigihînin Malpera Amûdê. Ev tê wê wateyê ku wan nekarî Malpera Amûdê bi tevayî têk bibin, wan nekarî tenê faylekê jî têk bibin.
Li gorî lêkolînên ku du pisporên teknîka malperan ên kurd û swêdî pêk anîn, êrîşa ji navnîşana IP 88.253.134.136 pêk hatiye. Ji vê IPyê ne diyar e bê ev êrîş ji kîjan welatî pêk hatine. Tiştî eşkere ew e, ku êrîşkeran kêmasiyek di programa malperê de peyda kiriye û bi alîkariya hin program û vîrusên ku di internêtê de peyda dibin, derbasî malperê bûne û xerabiya xwe kiriye.
Tevî ku me ji mêj ve dikarî malperê dîsa vegerînin wek berê, me biryar da ku em weş,ana wê rawestînin ta ku pisporên teknîkê ewlekariya malperê xurtir bikin û rê li ber êrîşîne nû bigirin. Hêviya me ew e ku mêvanên Malpera Amûdê dê bikaribin di zûtirîn dem de serdana malpera xwe bikin.
Em vê derfetê bi kar tînin ku em sipasiya hemû dost û hevalan bikin ku em di vê rewşê de bitenê nehiştin. Em bi taybetî sipasiya herdu pisporên kurd û swêdî dikin ku ji bo çareserkirina pirsgirêkan ji do de di nav hewildanan de ne.
Birêvebiriya Malpera Amûdê
07.04.2008
