Sersaxî bo Sînemxan keça Mîr Celadet Bedirxan Û malbata nivîskarê kurd Selah Sadellah

Birêzan !
Malbata Sadellah li Zaxo
Sînemxana Mîr Celadet Bedirxan
Azad û Dilnaz, zarokên rehmetî

Ezbenî, bi dilekî xemgîn me nêçeya oxirkirina dawî a nivîskar û rewşenbîrê kurd Xwedê jê razî Selah Sadellah sehkir…Dereng bû ji çûna wî re, hêj gelek kar û barên xebatê li hêviya wî bûn, gelek projeyên wî di nêvî de man..lê em çi bikin karê dinyê waye, dinya baqê nîvciye…Qedera bê ewle jî bi rola xwe radibe…Belê tevî wiha, rehmetî kêmanî nekir û pirtûkxana kurdî bi berhemên xwe dewlimend kir..

Bêguman em jî bi we re beşdariya şîna wî dikin, sersaxiyê ji we û gelê kurd re hêvî dikin û bi dengekî bilind dibêjin bela serê we, serê gelê Kurd û rewşenbîrên kurd sax be, cihê rehmetî bihişta rengîn be.

Konê Reş
Qamişlo 19/10/2007

——–

Nivîskarê Kurd Selah Sadellah kîbû ?

Selah Sadallah Nivîskar û rewşenbîrekî Kurd bû, zavayê Mîr Celadet Bedirxan bû, ango hevserê Sînemxan bû. Îro (19/10/2007), li başûrê Kurdistanê, bajarê Hewlêrê koça dawî kir û di eynî rojê de, ew bi awayekî rêk û pêk, bi beşdarbûna cemawerekî mezin ji dost, heval û kesayetiyên berpirsyar li bajarê wî Zaxo hat veşartin.
Rehmetî xwediyê xebateke dirêj bû di warê çand û edebiyata kurdî de zêdetirî 20 pirtûkan nivîsandiye.
Selah Sadellah bi ferhenga xwe ya Ingilîzî – Kurdî a bi navê (Ferhenga Selaheddîn)û her wiha bi pirtûkên wergerên ji Îngilîzî bo Kurdî, wek Berfên Kilîmencaro, romana Ewê Dîplomatik, hem jî ji Erebî bo Kurdî dihate naskirin.
Vê dawiyê rehmetî Selah Sadellah pirtûka Ehmedê Xanî (Mem û Zîn) ji Kurdî wergerandibû Ingilizî, ew berî mirina xwe bi çapkirina wê berhema xwe re mijûl bû. Hem jî pirtûkek li dor kurdên Suriyê amade dikir..