Di roja 30.10.2012 an de, li Amedê, paytexta Kurdistana bakur, helbestvan û nivîskarê kurd Arjen Arî, ji ber nexwşiya penceşêrê koça dawî kir. Û di roja (31.10.2012) de, ew li Amedê hatiye veşartin. Erê, ew stûnek bû ji stûnên parastina peyva Kurdî a resen, di bakurî Kurdisanê de.. Bê guman koçkirina wî a wiha bilez ziyanek mezine ji kultur û ferhenga Kurdî re.. Hêj ciwan bû, nû me dest bi xwarina tiriyê wî yê mezrone dikir..!
Sed mixabin ku qeder jî, hezar û yek rêkên wê hene, mirov nizane wê di kîjan rêkê re derbas bibe..
Di roja pêncşemê de (01.11.2012), em dostên wî, ji nivîskar û rewşenbîrên Kurd li Rojava, bajarê Qamişlo, wek wefadarî ji giyanê wî re, me deriyê şûna koçkirina wî û sersaxiya malbata wî û gelê kurd li bajarê Qamişlo, taxa xerbî, di hola mîr Celadet Bedirxan de vekir û pêşwaziya serdançiyan kir… Di gel ku me wêneyê wî, bi dîwarên holê ve daliqandin..
Hêjaye gotinê ku nivîskar û helbestvan Arjen Arî di sala 1956 an de li herêma Omeriyan, gundê Çalê çêbûye, xwendina xwe a pêşîn li gundê Çalê û Nisêbînê bi dawî aniye. Paşê di enstîtuya zimanê tirkî de li Amedê (Diyarbekirê), xwendina xwe qedandiye û bûye mamosteyê zimanê tirkî.. Ji biçûkanî ve mêla wî bi ser zimanê kurdî ve bû. Ji sala 1979 an ve, bi zimanê kurdî nivîsandiye û bi israr bû ku tev nivîsên wî bi zimanê kurdî bin. Û wiha di pirraniya kovar û rojnameyên Kurdistanî de berhemên wî hatine belav kirin.
Erê, tevî ku mamosteyê zimanê tirkî bû, wî tev berhemên xwe bi zimanê kurdî nivîsîne.. Nivîskar û helbestvan Arjen Arî yek bû ji wan nivîskarên Kurdistana bakur yên ku razî nedibûn bi zimanê tirkî binivîsîne, tev nivîsên wî bi zimanê Kurdî bûn û bi israr bû ku bi zimanê Kurdî bin..
Serê malbata wî sax be, serê gelê kurd sax be û serê rewşebîriya Kurdî sax be.
Ji pirtûkên wî yên ku hatine çap kirin:
1- Ev Çiya Rû Spî Ne
2- Ramûsana Min Veşartin li Geliyekî
3- Destana Kawa
4- Şêrgele
5- Çil Çarîn
6- Gorî û Bindest
7- Kukîlkên Bihîva
8- Orotîka
9- Bîhoka li Pişt Sînor
10 – Bakurî Helbestê
Konê Reş, Qamişlo, 02.11.2012
