Laleș Mîrza
_ Evder malam min e
Evder xanîyê min e
Evder mezelê min e
Yê bav û dapîrên min e .
_ Li ber vî derî :
Cercera dîrokê hate çerxandin
Û ez têde bûm
Zanîn bi hunerê ve hate hûnandin
Û ez pêre bûm .
_ Li ber vî derî :
Tuxm û tovê min bi axê re htine strandin .
Gwîzika pembo li ser zimanê zarên min hate fetqandin .
_ Li ber vî derî :
Mîtanîyo navê min li ser zîv û zêr kuttaye .
Hûrîyo dengê min di mișara de kolaye .
_ Li pêṣ vê derîzanê :
Heta niha ; hîn hîrehîra Hedban li ber guhane .
Ṣingeṣina șûra , ringeriga gurzan li ezmane .
Vîzevîza gullan , gurmegurma topan li layane .
_ îcar , îro ro;
Ecacoka te bilind bûye
Û pêre serê regezê te xwe paye dike
Û di neynika vê toșê de jî
Tu zikreșîya xwe pê kil dikî .
Kîna te berî destê te xwe vemal dike .
Bêbextîya te berî İGAL û darê te êrîș dike .
Dizî , talanî , keleșî hem gulîbirrî
Di hestîmarê te de , bûne pîr in spîrî .
_ Bidize șûtiko bidize !
Lêxe û her tiștî bipelêxe !
Bidize û li ti tiștî nepirse !
Mirîșk zeytûn genim sênîk û kefçî
Lê , tê her û her bimînî berdestk û birçî .
_ Bidize nankoro bidize !
Ez xweș dizanim
Bê dilê te çiqa dilerize !
Û tu xweș dizanî xirecira ecacoka te
Xwe li ber bareșê min nagire
Û ne babîzoka te
Xwe li ber pifkirina Bilûra min digre .
_ Rahêje çilikê xwe
Û rivdeyên xwe bide dû xwe
Û rê bike toz .
Nehêle kanîya min , hinasê te ,li vir bigvêșe
Û nehêle volkanê kesera min bighêje Zagros .
_ Ev xanî
Ev mal
Ev mezel
Bi xwedîye
Û xwedîyê wî ne sêwîye
Ezdîye…Millîye …Kîkîye
Botanî…Șikakî…Șêxîye
Azîzî…Hessinî…Heyderîye
Șûrtazî…Berazî…Dêwîye
Û bê dawîye …
Zêrevanên wî û peyva min , șiyarin qet narazên .
Şîrove (0)