Dijwar Tewfîq
Sedem, astengî û çareseriyên pêşniyarkirî
Ciwan bingeha sereke ya avakirina civakê û pêşeroja wê ne. Ew hêza guhertin, nûbûn û pêşketinê ne. Beşdariya wan di jiyana siyasî û partiyên siyasî de ji bo bihêzkirina demokrasiyê û nûkirina saziyên siyasî girîng e.
Lê mixabin, di herêma(devera) me de dûrketina ciwanan ji partiyên siyasî bûye diyardeyeke berbiçav. Ev rewş pêdivî bi lêkolîn û nirxandina sedemên wê, astengiyên heyî û çareseriyên pêşniyarkirî heye.
-Sedemên dûrketina ciwanan
Sedemên sereke yên vê diyardeyê ev in:
1. Kêmbûna baweriyê: Nakokî, dabeşbûn û nebûna demokrasiyê di hundirê hin partiyan de.
2. Paşguhkirina ciwanan: Kêmbûna derfetên rastîn ji bo beşdarbûna wan di rêvebirin û biryardan de.
3. Nebûna bernameyên ciwanan: Kêmbûna planên ku bersiva daxwaz û hêviyên ciwanan bidin.
4. Rêbazên kevn: Berdewamkirina awayên siyasî yên berê, ku bi nifşa nû re li hev nayên.
5. Pirsgirêkên abûrî û civakî:Bêkarî û zehmetiyên jiyanê ku bala ciwanan ji jiyana siyasî dûr dixin.
6. Kêmbûna hişmendiya siyasî: Kêmbûna perwerde û hişyarkirina ciwanan derbarê giringiya beşdariya siyasî de.
– Astengî û encamên vê diyardeyê
Dûrketina ciwanan dikare bibe sedema:
– Firehbûna valahiya di navbera nifşan de.
– Nûbûn û pêşketina ramanî û rêxistinî.
– Sînordarkirina derfetên rêveberî û biryardan ji bo ciwanan.
– Kêmbûna baweriya civakê bi partiyên siyasî.
– Kêmbûna beşdariya siyasî û derketina rêberên nû..
-Çareserî û pêşniyar
Ji bo kêmkirina vê diyardeyê, pêwîst e ku partiyên siyasî gavên pratîkî bavêjin, ji wan:
1.Bihêzkirina demokrasiyê û nûkirina avahiya hundirîn.
2. Vekirina derfetên rêvebirin û biryardan li pêşiya ciwanên jêhatî.
3. Amadekirina bernameyên siyasî yên bersivdar ji daxwazên ciwanan re.
4. Nûkirina gotara siyasî û bikaranîna amûrên ragihandinê yên nûjen.
5.Organîzekirina kurs û perwerdên siyasî, rêveberî û diyalogê de.
– Berpirsiyariya hevbeş
Dûrketina ciwanan ne tenê berpirsiyariya partiyên siyasî ye, lê berpirsiyariyeke hevbeş e.
Partî divê deriyên xwe li pêşiya ciwanan vekin, rêzê ji ramanên cuda bigirin û derfetên wekhev peyda bikin.
Ji aliyê xwe ve, ciwan jî divê xwe perwerde bikin, şiyanên xwe pêş bixin.
– Encam
Dûrketina ciwanan ji partiyên siyasî nayê wê wateyê ku ew têkiliya xwe ji jiyana giştî re winda kirine; belkî dikare nîşana kêmbûna baweriyê û nebûna derfetên rastîn ên beşdarbûnê be.
Nûkirina jiyana siyasî ji hundirê partiyan dest pê dike. Pêwîst e ku ji qonaxa kişandina ciwanan derbasî qonaxa bawerîpêkirin, û beşdardarkirina wan di biryardan de bibin.
Ciwan ne tenê endamên nû yên partiyan in, lê hevkarên sereke ne di pêşxistin, rêvebirin û avakirina pêşeroja civakê de.
Şîrove (0)