Fewaz Ebdê
Di êvareke bi bêhna axa bi neynûkan kolayî de
Min dengê henasên çiyayan bihîst
qerqerin zelalî ji mijê li xwe kiribûn û
bi dengekî bizorderketî “Ey Reqîb” digotin.
Te yê bigota ji devê gorê gazî zarokên xwe dikin.
Enfal?
ne sûretek e
lê destekî êzingêreşgirtî ye
sînga xakê vedixepêre
li termên nimêja xwe bidawî nekirine digere
ayeteke di hestiyê qoq de hatiye kolan û
henasa zarokekî
di nav kevirên ku ji serma û fîşekan dilerizîn
di hembêza dayîka xwe de fetisî
Elî El-Kimawî?
Di xewnê de dibû ewrekî jehrkirî û diçû
silav li milyaketan dikir û
ji wan re digot: “Mizgîniya min li we”
Milyaket dikeniyan…
û di nav dûmana xerdelê de winda dibûn.
4000 gund
Weke çirayên ji heriyê li keviyên komkujiyan hatin daleqandin
û her malek
di qirika xerîbekî bêwelat de
bû helbesteke denggirtî.
Lê Buhar…
Ax Buhar!
Ji nav hestiyên bizinên binaxkirî derket
cilê Pêşmerge li xwe kir
û li ser rûkê asîman bi dewêta nêrgizê nivîsî:
“Li vir yê ku li ser piyan mir, nemiriye”.
Darek ji qoqekî jibîrkirî şîn tê
Kulîlkek di bêrîka leşkerekî de li diya xwe digere
û minarek bang dike, ne azana nimêjê
Lêbelê, bi banga: “Rabin! Vaye jiyan vegeriya“.
Bi her berbangê re
Sirûdrek ji devê keviran derdikeve:
“Ey Reqîb“…”Ey Reqîb“…
Can namire
Şêwe tê guhertin
û di:
darekê
helbestekê
yan welatekî nayê binaxkirin de
vedigere.
Jinekê bi pistepist digot û dengê wê hêdî hêdî bilind dibû
Ez li wir bûm…
Min zarokê xweyî di nav şalika dapîra xwe de pêçayî hildigirtibû
Ba giran bû
Weke ku bîrdanka zemînê tevî hilgirtibe
Ji min re gotin:
Sûretê Enfalan li ser wan bixwîne
Min got: Na…
Ez ê ji wan re sirûda “Ey Reqîb” bêjim
ji bo ku li ser gorên wan
kulîlkên tirsê nas nakin şîn bên.
Dengê ruwê diya min ji bin axê dihat
ji min re digot:
Negirî!
Çemê ku termên me li ber xwe birin
Di sînga çiyê de bû rûbarek ji Nêrgizan
Û vame ez
dengên wan ji nav bayê kom dikim
şaleke kesk ji wan çêdikim
û li milê keça xwe dipêçim.
Ji ber ku em miletekî têk naçin, em tên veguheztin
Em dibine darek û vedigerin
dibine sirûdek
û bi her berbangê re asîman bang dike:
“Ey Reqîb her…”
