Ronî ELÎ
Govenda evîneke lale
Tîpên helbesteke bê dawî
Xebata dîrokeke wendayî
Di bonîşê
Derûneke tengijî de
Kêferata
Metirsiyên berbangê
Di çerxeke aloz de
Bi
Endîşe û azar
Hawara xwe dikin
Bîr û boçûnên êvara
Di hastên bê şiyan de
Li serê sibeha
Dimebestên talankirî de
Bi tevra ezeziyeke
Tund û dijwar
Dîwarên sazmend
Radihêjin
Û
Hildiweşînin
Qêrîna kurdekî
Di şerê bîrodoziyên bervacî de
Nêrînên bê sûde de
Bahozekê li dar dixe
Û
Penaber dibe
Û hino hino
Nakokiyên
Dijberî û rikberiyê
Di çarçewa
Giyanekî nîv kuştî de
Mejî ji laş
Vedqetîne..
Dozekê ji ezeziyê terxan dike
Û pirseke pîroz
Di pevçûnên
Serdar û serweran de
Bê pişt dihêle
Tev ku,
Dengê qêrînan
Di sîngên reben de
Hîn
Bangewaz û omîdewar
Nalîna xwe
Diherikîne
1412008
————-
Divê rabî
Di qurmê dareke şewitî de
Di perwaza dîmeneke ji hevketî de
Vekolîna,
Bîranînên seqet
Li ser
Dîmenên qeşeng
Biçespînî
Û
Bineqşînî ..
Di nav lepên lawiran de
Di kuzota wêranên dorpêçkirî de
Temenê,
Sirûda jiyaneke xemsar
Di gewriya
Ziwa de
Bixwînî
Û
Binirxînî ..
Di hembêza jineke beravêtî de
Di sînga zemîneke talankirî de
Teşiya,
Hêviyên lawaz
Ahînên bê deng
Birêsî
Û
Bihûnî ..
Dive rabî
Qefdeyên çîçekan
Ji nêrgiz û sosinan
Bi egera,
Bûyerên rûxwandî
Çalakiyên perçiqndî
Li ser termê
Siwarên mezobotamya
Daçikînî
Û bi lavlav û omîdan
Giyanê nemiran
Di xemla nûjeniya
Tîrêjên aso de
Beşdar
Û
Şakî
Dive rabî ..
1112008
