Xelwetgeha Ronahiyê.


Mizgîn Hesko

Nîvê şevê
Tîrêjek ji ronahiyê
Bi destên min digire
Û ber bi stêreke nenas ve
Bê basik
Min dibe!

Matmayîneke herî sosret
Canê min…
Dilerizîne
Bi diranên gewherî
Rewanê min…
Dikeritîne!

Tarîbûn berbelav e
Û ez…
Di xelwetgeha ronahiyê de
Bê zar û ziman
Wiha mendehoş

Ji şûşeya gerdûnê
Dêrîntirîn mey
Bîstikên revînok
Bi min re dinoş..?!

Xelekek tije hezî
Û nîv şevek avrayî
Bi hilma gulavê

Destên ronahiyê ne
Min…
Tevlî bêdengiyê dikin
Û hîn…
Li ser tayekî zîz û nepenî
Dilê min
Radixînin?!

Heman dest in
Min…
Ji min bê basik
         Û bê can dibin

Diçim tewafa
Heyveronê
Heft caran
Sermest
Dizîvirim
Li gerdûnê

Bê çare me
Tevlî…
Malstêra demê dibim
Xwe jibîr dikim
Ku vedigerim
Û tarîbûn berbelav e
Parçeyek ji min
Li wir…
Di nimêjê de
Hîn dimînim!

Xelekek dagirtî raz
Û nîv şevek herî naz
Bi hilma enberê

Min…
Tevlî hêminiyê dikin
Û hîn…
Li ser tayekî nehînî
Hişê min dixwînin?!

Tîrêj in
Û nîvê şevan
Min…
Tevlî taveheyvê dikin
         Ne Vînos
         Ne jî stêreke bi coş û xiroş im?!

Xuneceke sor î bêguneh
Diçe serdana kadizê
Ku tarîbûn hîn berbelav e
Şeva nîvê şevê
Xwe ji bişkojên dargulê vedizê
Û tevlî…
Asîmanên nenas
Dibe!
Xelekek tije stêr
Û nîv şevek..
Ji yaqut û zêr
Bi hilma miskê
Û ez..
Mat û behitî
Hîn…
Dest ji xwe cûyî ….!!!!

Heman dest in
Hîn…
Li ser tayekî
Ji hevrîşimê tenik
Tiliyên min vedikolînin?!

Destên ronahiyê ne
Na…
Ew bitenê ne Destên ronahiyê ne
Lê…
Roniyeke hîn cudatir
               Û bihtirîn çirisîn e

Hin caran
Min…
Tevlî xelek û şemalê dikin
Û hin caran
Li ser CamaCem
Têne pêşberî min

Rengvedan in
Sivik û ciwan in
Û hîn…
Li ser tayekî razber
Rewanê aşiq disohtînin?!

30. Berfanbar 2021.

شارك المقال :

Leave a Reply

Your email address will not be published. Required fields are marked *

اقرأ أيضاً ...

Salih Cefer



Qedexebûna zimanê kurdî bi salên dirêj bû sedema paşketina hemû cûreyên wêjeya kurdî û bi taybetî jî ya zaravayê kurmancî.
Tevî ku di van salên dawî de li gelek alîyên Kurdistnê rewşa wêjeya kurdî (kurmancî) bi pêşve çûye jî, lê hîn pêwîstîya bi pêşveçûnên bêtir heye.
Kanîyên pêveçûnê pirin, yek ji wan…

Ebdûlazîz Qasim

 

Ji demê hatina Ehmed El-Şerih li ser desthilata Sûriyê, piştî hilweşîna rejîma Esed di 8ê çileya sala borî de û heta îro, bi carekî rewş û rastiya Sûriyê ya civakî, cugrafî, siyasî, etnîkî û olî tê paşguh xistin, bi taybetî hebûna gelê Kurd bi carekî tê paşguh xistin, her bigire…

Amadekirin û kurmacîkirina tekstên stiranan: Ednan Bedreddin

 

Mezher Xaliqî yek ji navdartirîn hunermendn kurd ên sedsala bîstan e. Ew di sala 1938 an de weke zarokê malbateka kurd a oldar li Sune (Sanandaj) hatiye jiyanê. Behremndiya Xaliqî di warên goranîgotin û werzişê de ji salên dibistana seretayî ve derketine pêş. Her di…

Ebdûlazîz Qasim

Di dîroka navçeyê de, hîç erdnîgariyek bi navê Tirkiyê nîne, û deweta Tirkiya li ser sextkariya dîrokê û talankirin, qirkirina Kurd, Ermen û Yonaniyan û herwiha li ser dagîrkirina beşeke mezin ji xaka kurdistan, Yonanîstan, Qubirstan û Ermenistanê hatiye avakirin.

Projeyên Tirkan her ji destpêka xwe ve û heta…