Çi bawerî ye, seydayê baweriyê!
Ji mêj ve ew xak guhdêra himhima çekê te ye..
Nerîneke seyr e,
bi hetava azadiyê re dipeyive!
Demjimêreke bîrhatin e,
neşêt demê birawestîne!
Dengê tifinga te huner e,
çavdêriya te bê hember e,
navê te ji Pêşmergeyên te re çeper e..
Ber û lat bi wê hêzê re dilîlînin,
bi berxwedana dilê te yê mezin
serê xwe diçemînin!
Rextê bendewar hêj li meydanê bi nifrîn e,
hêj sirûda pakrewaniya te dixwîne..
Pêşmergeyê dilpola,
mêrxasiya te
çiya bi çiya şûnpêyên te kola..
Firindeyê behişta berîn,
ev pênûsa hejar dê çi pesnê te bide..
Jîndarê Kurdistanê,
xwedan dastanên cengî
bi wê evîna we,
kulîlkên azadiyê vedijîn..
17.11.2022
Ezîz Xemcivîn
…………………………………………………………………………………
چ باوەری یە، سەیدایێ باوەرییێ!
ژ مێژڤە ئەو خاك گوھدێرا ھمھما چەكێ تە یە..
نەرینەكە سەیرە، ب ھەتاڤا ئازادیێ را دپەیڤیت
دەمژمێرەكە بیرھاتنە، نە شێت دەمێ براوستینیت!
شال و شەپكێ ئەڤینا تە لێڤێن چیا دخەملینن..
دلسۆزێ كوردینیێ ئافەرین،
دەنگێ تفەنگا تە ھونەرە،
چاڤدێرییا تە بێ ھەمبەرە…
ناڤێ تە ژ پێشمەرگەیێن تەره، چەپەرە..
بەر و لات ب وێ ھێزێ را دلیلینن،
ب بەرخودانا دڵێ تە یێ مەزن سەرێ خو دچەمینن!
رەختێ بەندەوار ھێژ ل مەیدانێ ب نفرینە،
ھێژ سروودا پاكرەوانییا تە دخوینە..
پێشمەرگەیێ دلپۆلا،
مێرخاسيا ته
چیا ب چیا شوونپێیێن تە كۆلا..
فرندەیێ بەھەشتا بەرین،
ئەڤ پێنووسا ھەژار دێ چ پەسنێ تە بدەت،
ژیندارێ كوردستانێ،
خودان داستانێن جەنگی
ب وێ ئەڤینا وە،
كولیلكێن ئازادییێ ڤەدژین..
17.11.2022
ئەزیز خەمجڤین
