Merwan BerekatJi çend salan ve, nemaze piştî ku şoreşa Sûriyê dest pêkir, li herêma Efrînê geşedan û tevgereke çalaktir di warê nivîsandina bi zimanê Kurdî de çêbûye. Têştê balkêş û berçav ew e, ku jina Kurd roleke zor hêja di vê geşedanê de dilîze. Bêguman, ev jî cihê serbilindî, şanazî û rêzgirtinê ye.
Ji ber hin teybetiyên civakê, jina kurd û nemaze ya ku di warê nivîsandinê de dixebite, pir dijwarî, lukmandin û astengî çi ji aliyê malbatê û çi jî, ji aliyê civakê ve li pêş wê derdikevin.
Ji ber wê jî, zor pêwîst e ku piştevanî û pesendkirin ji xwediyên van pênûsan re were kirin, ta ku pirtir rê li pêş tevger, xebat û çalakiyên wan hêsan bibe.
Li herêma Efrînê hin nivîskar û helbestvanên jin xebateke zor hêja di warê rojnamegerî û zimanê Kurdî de dikin, û berhemên wan di pirtirî rojname, kovar û malperekê de tên weşandin. Ne tenê weha, lêbelê nivîsandina bi zimanê Kurdî ji bo wan bûye karekî rojane, û beşdariya wan di çalakiyên wêje, zimên û rojnamegeriyê de jî, berçav in.
Li herêma Efrînê gelek nivîskarên jin derbazî asteke bilind a nivîsandina bi zimanê Kurdî bûne. Belê, Ze`fet Henan û Merwa Birîm ji wan nivîskaran e. Ev herdu mamosteyên birêz hem nivîskar û hem jî helbestvan in. Mamosteya rêzdar Ze`fet Henan serkirdeya rojnama Rewşen a ku ji aliyê Komela Rewşen Bedirxan ve, li bajarê Efrînê derdikeve ye. Ev rojname ya dengê jina kurd e. Ew rojnameke dubeşane bi zimanê Erebî û yê kurdî ye.
Mamoste Merwa Birîm endama komîta Siya Wêje ya ku ji mehê carekê li bajarê Efrînê çalakiyên wêjeyî li dar dixîne ye. Herweha helbest û mijarên wê yên bi zimanê Kurdî û Erebî di pir kovar û rojnameyan, nemaze di rojnama Rewşen de, bi şêwakî berdewam tên weşandin.
Ji ber keda van herdu mamosteyên hêja di warê zimên û rojnamegeriya kurdî de, li Roja Rojnamegeriya Kurdî wan xelata Kemal Henan a pesendkirina zimanê kurdî, ji aliyê komîta vê xelatê ve wergirtin.
Em xelatkirina hedu mamosteyên rêzdar pîroz dikin.
