Vejîna KurdDi nirxandina pêşketina miletan de, rêzgirtina mafê jinê pîvaneke zor giring e, miletê ku rola jinê piştguh kiriye û bi ezeziya nêremejîtiyê civaka xwe ava kiriye, ew kulek maye û tucarî pêş neketiye, ji ber ku rola jinê di pêşketina mirov, malbat û civakê de zor pêwîst e.
Miletê Kurd yek ji miletên cîhanê ku heya roja îro xebata hebûn û bicîkirina nasnama xwe ya netewî û azadiyê, li hember nijadperest û desthilatên şûfen dike, jina Kurd jî, nemaze di van salên dawî de, bi hemû hêz û vîna xwe beşdarî vê xebatê bûye, di baweriya wê de ye ku azadiya welêt û ya jinan ji hev cuda nabe.
Welatê ku beşek ji pêkhateyên wî bindest û ne xwedî rol be, ew tam rizgar nabe, lewma jî jina Kurd bi mêrê Kurd re, mil bi mil, pêvajoya vê xebatê pêşve dide. Bêguman, lehengiya YPJ ji tevahiya cîhanê re bûye mînak û bandoreke mezin li ser şoreşa Kurdistanê kiriye.
Îro em dibînin ku jina Kurd bi xwîna xwe nexşeya welêt li ser gozemînê nîgar dike û serkeftinên mezin bi sîngê dîrokê ve dadiliqîne…
Belê.. Îro jina Kurd, ji bo bicîkirin û teqezkirina hemû mafên xwe yên rewa têdikoşe. Bêguman gelek pirsgirêkên çanda kevneperestiyê li pêş wê hene, lê ew bi zanîn û hişmendî bervaniya hebûn, azadî û mirovatiya xwe dike…
Xebata jina Kurd xebata gelê Kurd e, em serkeftinê ji wê re hêvî dikin û 8ê Avdarê, Roja Cîhanî ya Jinan li xwe, wan û li hemû jinên cîhanê pîroz dikin.
Ev gotara seretayî ya hejmara 15an ji rojnama REWŞEN e.
