Xizan Şîlan
ez
dergûşeke li çolistanên qijilî
pêxwas
tazî
tî
birçî û sêwî mayî me
xwîna pêsîra dayika xwe
ya sîngsedef û giyanmirî
dimijim
ez
dergûşeke li çolistanên qijilî
pêxwas
tazî
tî
birçî û sêwî mayî me
xwîna pêsîra dayika xwe
ya sîngsedef û giyanmirî
dimijim
dengê qîjeqîja çûkeke perşikestî
hêlîn wêranbûyî
bêxwedî
û şeveder mayî me
ji ber kul û kederên dinyayê
axîn û nalînan
dikişînim
li nav toza qehpikên çavsor
bi tena serê xwe
hatim terikandin
bedena min
di êş û jana çaxên genî de
dilerize
li xurbetê
rondikên bîranînên mişextbûyî
dadiqultînim
movikên pişta dahatûya min
ji hev de ketin
di bin barê dîroka zalim de
bêhna min çikiya
çeqel û zexelên dema reş
çermê xewn û xeyalên şîrîn
gurandin
minafiqan
hinav li min peritandin
teyrokên xezebê li gulîstana şîn
barandin
porê serê keç û bûkên bermalî
rûçikandin
kindirê îxanetê li stûyê qedera min
alandin
keska xewên min
herimandin
li bêdengiya rojên stewr
derbider bûm
dêlegurên hov
di perdeya guhên min de
zûrezûr in
di hêrs û tirsa xwe de
vediciniqîm
mija ewrên reştarî
xwe dagirtiyê ser kêf û şahiya
seyrangehên min
temenê perîşan
bi keservedanên kûr û dûr
hatine stirihandin
dilê sefîl
di qêrîn û hawara salên kambax de
diperpite
di îskeîska girîna gewriya xwe de
difetisîm
kevirên çiya û zinaran
di kuştina min de
serî hildan
hestên sonda tolhildanê
hiş û mêjiyê sebira min
rapêça ye
êdî ez ê
ji nav lepên xêrnexwazan
bifilitim
bafiroka aştî û aramiyê
ber bi stêrkên asîmana sayî ve
bifirînim
li ser axa şaristaniyê
çirûskên agirê eşqa Mem û Zînê
geş bikim
birîna kezeb û gurçika welatê rojê
bi xweşbêhna bayê rojava
bipêçim
li şevekoriya demên xewle
meşaleya hurmet û rûmetê
vêxim
kaniya jiyanê
ber bi asoya serkeftinê ve
biherikînim
bi tilîliyan şaxên dara azadiyê
bi keskesora rengîn
bixemilînim
li baxê hezkirinê
tovên kulîlka ronahiyê
bireşînim
hêviyên giyana qefilî
bi melûliya tîrêjên berbangê
binixumînim
li ber wîzîna firtûneyên har
destmala govend û dîlanê
bihejînim
di sergêjiya mestbûna xwe de
li dor helbestên kulek semaha şadiyê
bigerînim
di dengvedana derûniya xwe de
stranên mizgîniya serbestiyê
bilorînim
û ez ê
azad û bextewar bijîm
Xizan Şîlan
2015-06-18
Stockholm
