Konê ReşDoh (04.05.2015), kalemêrê kurd yê orjînal Hecî Ibrahîmê Çêlkî, ji temenê 83 salan li Qamişlo koça dawî kir. Di eynî rojê de, termê wî hat guhestin gundê Dugirê û ew di goristana welatparêzên kurdan de hat veşartin.
Ew, kurê Remê Hecî Osman e, di sala 1932an de li gundê Çêlka Eliyê Remo çêbibû. Di 20 saliya xwe de xwinlî bibû û hatibû Binxetê, bibû yek ji akinciyên bajarokê Tirbesiriyê, vê paşiyê mala xwe guhestibû bajarê Qamişlo û jiyana xwe lê derbas dikir..
Hecî Ibrahîmê Çêlkî, wek pirtûkxameyeke kurdî ya li ser du lingan bû. Ew di nav eşîrên çiyayê Bagokê de mezin bibû, koka eşîran, bavikan û axayên wan xweş nasdikir.. Mêraniya wan, bêbextiya wan û qenciya wan çak bihîstibû.. û xweş zanîbû, mala mala Eliyê Remo kî ne, mala Ismaîlê Werdê çi kesin, mala Haco ji ku hatine û çi eşîrin.. Fillehên Raîtê kî ne.. Hevêrka Eşîre an herême..
Her ku min ew didît, min gelek pirs jê dikirin, wî jî bi kêfxweşî bersiva pirsên min dida û şaşiyên min rast dikirin.. Ew dîdevanê (Şahidê), sed salî bû ji bûyerên herêma Hevêrka û çiyayê Bagokê û bûyerên ku di nav kurdên Binxetê de qewimbûn.. Ew mîna ferhengekê bû ji çîrok û serpêhatiyên kurdî yên orjînal.. Di baweriya min de bi koçkirina vî kalemêrê kurd Hecî Ibrahîmê Çêlkî re pirtûkxaneye me hat şewitandin.. Yezdanê mezin wî bi dilovaniya şad bike, cihê wî buhişta rengîn be, serê malbata wî sax be û serê gelê kurd sax be.
