Konê Reş Hemza Beg yek bû ji rojnamevanên kurd yên sereke. Di destpêka sala 1918 an de yekemîn rojnameya kurd/tirkî bi navê JÎN li Stenbolê weşandiye, hem jî dîbacak bi nirx û biha digel Mem û Zîna Ehmedê Xanî çap û belav kiriye.. Ji bo çapkirina vê pirtûkê hatiye girtin.. Di sala 1928 an de ji zindanê hatiye der û yekser berê xwe daye nav kurdên Binxetê û tevlî refêwelatparêzên kurdan bûye.. û bûye endam di civata Xoybûnê de..
Di sala 1930/1031ê de, piştî têkçûna şoreşa Agirî, li ser daxwaza hikumeta tirkiyê, hikumeta Fransî ya ku li suriyê desthilat bû, dest datîne ser Hemza beg jî digel Mîr Celadet Bedirxan, Dr. Ehmed Nafiz, Memdûh Selîm, Nûreddîn Zaza, Osman Sebrî, Qedrî Can, Qedrî û Ekerm beg Cemîl paşa, Haco axa, Mustefa û Bozan Şahîn…û tev li Şamê xistine bin rûniştina zorê de..
Di sala 1932 an de, Hemza beg ji rex desthilatdarên fransizan ve dibistanekê li Eyndîwerê, di binya bajarê Cizîra Botan de vedike û zarokên kurdan fêrî ilm û zanînê dike û di nav kurdên Cizîrê de dibe wek gerînendayekî ji kovara Hawarê re û propagende ji zimanê Kurdî re dike..
Di sala 1940 an de dibe edîtorê yekemîn dibistana fermî ya herî bilind di bajarê Hesekê de li parêzgeha Cizîrê.. Di sala 1943 an de dibe berpisyarê dibistanan û zanînê di tevî parêzgeha Cizîrê de..
Li dor jinenîgariya wî; jina wî tirk bû, zarok jêre çênedibûn, bi gelek zimanan dizanîbû. Bêtir bi van kesan re dida û distand: Mîr Celadet Bedirxan, Dr. Kamîran Bedirxan, Memdûh Selîm beg Wanli, Dr. Ehmed Nafiz, Dr. Nûredîn Zaza, Qedrî û Ekrem beg Cemîl paşa bûn..û hin xiristyan û ermen hebûn..
Ew di roja (05/04/1958)an de, anku berî 57 salan, li bajarê Hesekê koça dawî kiriye û li ser dazwaxa wî, gelê kurd, ew li gundê Dugirê, di nav goristana welatparêzên kurdan de veşartin.
Gundê Dugirê li bareşî Qamişlo ye bi dor 27 Km an, ji welarparêzên kurdan yên ku di vê goristnanê de hatine veşartin: Hacî Mûsa begê Xuwêtlî, Dr. Ehmed Nafiz beg Zaza, Arif beg Abbas, Haco axa, Silêmanê Abbas Axa, Dr. Qasim Miqdad Cemîl başa, Dr. Dara Arif Beg Abbas, Ebdulrehman axa Eliyê Ûnis, Hesen axa Haco…
Wê salê, anku sala 1958an, dema ku Hemza Beg çûye ber rehmeta Xwedê, helbestvanê nemir Hejarê Mukiryanî yê ku yek ji helbestvanên komara Mehabadê bû, piştî herifandina komarê reviyabû, xwe li nav Kurdên suriyê, li bajarê Tirbespiyê girtibû û lê dijîya.. Hingê rehmetiyê Hejarê Mukiryanî ev nivîsandin li ser kêla ber serê wî nivîsand:
Mamose Hemza beg
Rehberê fidakar !
Pir kes ji xew te kirine hişyar
Raze bi xoşî bes menale
Peyman elê me ew hewale
Rojî ku welat bijî bibînim
Ez mijde bi xo bo te bînim
15ê Remezana 1377 Koçî
05/04/1958 Zayînî
Konê Reş, Qamişlo, 01.04.2015
