Xemginê REMO
Keçê .. kê gotî ye :
Çîya bilindin ez te nabînim ?
Çîya çendî bilind bin
Li bin çengê baz
Nizim dimînin …
Çol û beyar şax û newal
Pêk ve li bin bazikê min
Dimînin …
Û eger tu yara mine
Dvê ku ez te bibînim ….
***
Xanê… kê gotî ye :
Rêya dirêj dawî nîne ?
Gulê .. rêçê evînî yê kurtin
Û dildarê te şêt û dîne …
Li ser pişta Bozê rewan
Ez rêwîme
Û bila rê pirr dirêj be
Ku rêwîtî xemrevîne
Û dildarî serxweşî ne …
Ez serkêşê sofîyame
Di pûtgeha evînê de
Were carek
Dev û çavên te yê pîroz
Ez pîroz kim pîrozîyê
da nebêjim:
jîn derewe
û rêçên dirêj bê dawîne …
****
Canê ..kê gotî ye:
Derya pan û firehin
Kûr û bê binî ne …
Eger ku dil bi evîn be
Evîndar ..kelekvanê her derya ye
Pêlên derya .. şîpên çema
Nabin rê-bend li pêş dila
Ji wan çavên feyrûzî
Hêsrên lûlû ne barîne …
Bendewar û çav li rê be
Haha te dît ez hatîme ….
Eger çendî ez biwestim
Tu bîn-vedana dawîne ….
