Helbest u Vidyo

Evîna ji agir

Baran Heso
Gelek caran dixwazim bê deng bim
Gotinê di hindirê dilê xwe de digirim û dikelînim
Hevokê di nava ramanan de bi dar ve dikim
Şîrê heftrokî di pozê biçûkaniya xwe de zuha dikim
Xwe di navbera çargoşan de asê dikim
Ji bo yî ku ez bahsa evîna te nekim
Lê ev evîn mîna agirekî hilor û bilind dibe
Ez nêzîk min dişewitîne, ez dûr min dikuje
Gulan li ser pişta buhara dil zuha dike
Ew dûr e û tîrê evîna wê ralgewriya min diqetîne
Himîn û nalîna bilûra Hesen li ser „Hediya Qaso“* ji min tîne
Çar biskên kurmancî hestê min li min har dike
Cil û bergên kewî bi girêdana serî
Dest weke hêlanê li min dihejîne
De bera ev dil bi ziman û dev ba
Kolana tu lê bi guh û çav ba, ava çemê evînê ne ker û sar ba
Hema carekê te ji xewa te şiyar kiriba
Dengê xîzexîza fermiskên min bi te gihandiba
Evîn li min tenê bû agir
Ne tê vemirandin ne diweste, ji bedena min dixwe
hêdî hêdî min di himêza xwe de dihelîne
Hew zaniyarî li min dibe mêvan
Bûme şagirtekî alfabêya xwe wenda kirî
Pênûsek di nêvî re parçekirî di qewlikê maleke jê barkirî hatiye jibîrkirin
Dema evîn li te dibe agir
Dost, heval ji civata te bar dikin

Ev e ez û evê evîna ji agir ev e evîna ji agir…

29.09.2024
Baran Heso

Ev gotar bikêr bû?

Nêrîna te ji bo başkirina naverokê alîkar e

0% ji xwendevanan ev gotar ecibandin
(0 nirxandin)

Şîrove (0)

Şîroveya xwe binivîse

Nivîsên din