Fewaz Ebdê
Were xanim!
Were!
Da ez hemû şkestinên xwe
Revecengên xwe
Di çavên te de bixwînim
Kirasê dîroka xwe jê bikim
Cugrafiya çavên xwe
Di awirên te de dorpêç bikim
Dema ez
Li çavên te dinerim û
Di kûrbûna wan de noq dibim
Bi girafêtê
Qirika Selahiddîn dixemilînim
Riha wî kurt dikim û
Li Waşintun, Mosko û Berlînê digerînim û
Geh
“Igalê” dikim stukura wî û
Wî li ber te datînim
Were xanim!
Şûrê êl û olê yê di riya min de çandî
Şaxdayî
Perda tenbûra min diçirîne
Stiranên min.. digurîne
Were!
Vane, qerpol û pîneyên min
Ji hinan re bûne al
Were xanim!
Dîwarê Berlînê herifî û
Dîwarê di hinavên min de ava
Hê avaye
Min
Ji min cuda dike
Bûme evîndarê dînîtiyê
Bi dînîtî li xwe digerim
Were!
Min, bi min bide nasîn
Di kurtejînê de..
Gorekê ji evîna min re
Di dilê xwe de
Bi
ko
le
Were …
2013
