Mizgîn Hesko
Rêbendan e…!
Û mijê…
Xaniyê daristanê
Û piyên Katejimêrên zîz
Bi sîtavên dûmanî
Dorpêçkirine
Landika textîn
Tevlî zemawenda mijê bûye
Ji tîqtîqa wê zaroka sava
Şekirok diniqutin..!
Û pêre, pêre…
Kenarên Hîn jî xilmaş
Ji sawîrên şevên dirêj
Hişiyar dibin.
Darên şilfî, rût
Di himêza pêlê de
Ber bi asoyên bîreweriyê ve
Wiha paye dizîvirin…!
Ji mêj ve
Dil…
Hogirî henaseyên siruştê bûye
Û Ji mêj ve
Kakilkên di sebetên payîzê de
Zindî..
Gulomîdên erxewanî
Diseridînin…?!
Bihara çûyî
Kulîlkên xweşkok ên behîvê
Bi şaxikên tazî ve
Wekû pirpirîkên mizgîniyê
Radpelikîn mijankên asîmên…!
Û paşê…
Qeraxên riyan
Bi gernijînên sihirdar
Mişt kiribûn..!
Rêbendan e…!
Û rê…
Ne bi bendên berfê
Yan bi pendên şevbuhêrkan
Lê…
Di olana pêlên mijê
Ber bi destên mat û westiyayî ve
Gav bi gav
Diherikin..!
Erê dest in !!!
Û tu dibêjî:
Na ew bixwe „ Bask in“…?!!!
Û bager…
Xweş dizanî
Çawa perên aza
Bi fetlînokên serhişk
Û hêrsa yariyên xwe
Raxîne…
Û dubare wan ber bi jor ve
Biferidîne..!
Dilê dergûşeke bêguneh
Yan jî dilê min e…?!
Û dilê mijê
Û pêlên bagerê
Ji mêj ve…
Spîbûna baskên rêbendanê
Ber bi xwe ve
Hilgirtin e..!!!
- Rêbendana 2025
