DENGÊ HAWARA TE

Xizan Șîlan

dengê hawara te
melûliya rondikên çavên
ziwa ye
keservedana temenekî
bi jan e

kaniya xeyalên bi coş e
dengvedana şikeftên
tenha ye
têkoşîna li hember zexelên
demê ye
dengê hawara te
guregura reşewrên barana
azadiyê ye
hêrsa pêlên okyanûsa ye
kefenê mirineke zûhatî ye
sebira xwedawendên
bêdeng e
dengê hawara te
nalenala sînorên welatekî
bindest e
reşgirêdana gund û bajarên
hilweşiya ye
hesreta ronahiya berbangên
derengmayî ye
daxwaza lêvên bêmaçmayî ye
xatirxwestina ji rojên tarî ne
dengê hawara te
çûkê baskşikestî ji refên xwe
veqetiyayî ye
êşa li ser dilê evîndara ye
pêjna helbesteke nehatî xwendin e
sir û seqema zivistanên hişk e
xumxuma herika çemên har e
siwarê hespê li meydana
cengê ye
dengê hawara te
kezebşewata lorîna dengbêjên
serhedê ye
feryad û fîxana bilbilê îsyankar e
tenêtiya
axîna dûmana cixara min e
zingezinga dengê dahola
jiyaneke nû ye
pelvekirina daristanên şîn e
kovanên di malzaroka hezkirinê de
hatinî meyandin e
kutekuta kelecana dilê xeydok e
dengê hawara te
qêrîna agirê berxwedanê ye
bêrîkirina bêhna kulîlkên
biharê ye
xewna çirûskên çira mezlûma ye
naleta dîroka durû ye
raperîna çiya û zinarên berz e
sirûda ala serkeftinê ye
sonda tolhildana şervanên
mêrxas e
û mizgîniya
xemla Kurdîstana serbixwe ye

Xizan Șîlan
2018-12-18
Stockholm